بنګله دېش: که داعشۍ ناوې دلته راغله، اعدام به شي

د بنګله دېش د بهرنیو چارو وزیر وايي، برتانوۍ توکمه شمیمه بېګم چې د داعش په ناوې مشهوره ده، بنګله دېش ته لېږلو سره به د اعدام حکم ته منتظره وي.

د نوموړي په خبره، دا ښځه به خپل اصلي ټاټوبي ته رسېدو سره د ترهګرۍ په جرم محاکمه شي.

شمیمه بېګم د سوریې شمال کې تر نیول کېدو راهیسې بندۍ ده. نوزېږی یې هم څه مهال مخکې په بند کې مړ شو.

د بنګله دېش د بهرنیو چارو وزیر عبدل مومن له بي بي سي سره خبرو کې وايي، د مېرمن بېګم پېښه له بنګله دېش سره هیڅ تړاو نه لري.

شمیمه بېګم او د لېسې دوه نورې نجونې پر ۲۰۱۵ کال له لندن ترکیې او بیا سوریې ته لاړې چې دغه هېواد کې د اسلامي دولت په نوم ډلې له خلافت سره یو ځای شي.

خو کله چې داعش سوریه او عراق کې له ولکه شویو سیمو په شا کړل شو، مېرمن بېګم د سوریې شمال کې د کورد ځواکونو کنټرول لاندې سیمو کې یوه بند ته ولېږدول شوه.

دې بند کې د مېرمن بېګم پېژندل کېدو سره خپل ټاټوبي برتانیا ته د هغې د ستنېدو په هکله بحث زیات شو او ور پسې د برتانیا د کورنیو چارو وزارت فرورۍ کې وویل، چې د نوموړې د وګړتوب حق یې له منځه وړی او بیا برتانیا ته تللی نه شي.

دا پرېکړه په داسې مهال ده چې نړیوال قوانین وايي، که د وګړتوب له منځه وړلو له امله یو څوک بې هېواده شي، نو حکومتونه له هغې د وګړتوب د سلبولو حق نه لري.

دا هرڅه په داسې مهال دي چې شمیمه بېګم له داعشي خاوند یو زوی درلود او د هغه د برتانویتوب په هکله بحث هم دا شرایط سخت کړي و، خو څه مهال مخکې د مېرمن بېګم زوی د زوکام او سینه بغل له امله مړ شو.

په ورته مهال د شمیمه بېګم وکیل تسنیم اکونجي له بي بي سي سره خبرو کې وايي، چې د نوموړې ستونزه له بنګله دېش سره کوم تړاو نه لري.

شمیمه بېګم هم د خپل وکیل له لارې د برتانیا بهرنیو چارو وزارت باندې نیوکه کړې او په دې تړاو یې محکمې ته شکایت هم کړی دی.

له بلې خوا د بنګله دېش د بهرنیو چارو وزیر هم وايي، داسې کوم امکان نشته چې هېواد یې مېرمن بېګم ته د وګړتوب او یا دغه هېواد ته د تلو حق ور کړي.

"شمیمه بېګم هیڅکله هم د بنګله دېش د وګړتوب غوښتنه نه ده کړې او مور او پلار یې هم د برتانیا وګړي دي".

د نوموړي په خبره، د برتانیا حکومت د هغې مسوولیت لري او باید په دې تړاو پرېکړه وکړي.

په ورته مهال زیاتوي که شمیمه بېګم بنګله دېش ته ور شي د ترهګرو سره د صفر زغم چلن سره به مخ شي:

"په دې برخه کې د بنګله دېش قانون پوره څرګند دی، ترهګر باید اعدام شي".

که څه هم شمیمه بېګم له داعش سره د یو ځایېدو لپاره سوریې ته تللې، خو د بریدونو یا ترهګریزو هڅو اړوند کوم تور یې نه دی منلی.

د شمیمه بېګم وکیل تسنیم اکونجي هم وايي، چې د برتانیا حکومت هم له خپلې پرېکړې اوښتلی او شمیمه بېګم ته وګړتوب بیا ور کولی شي:

"او دې سره د محکمې چارو کې د برتانیا د خلکو د مالیې له لارې ترلاسه شوو میلیونونو ډالرو د مصرف مخه نیولی شي".

د هغه په خبره، د برتانیا له خوا د شمیمه بېګم د وګړتوب حق اخیستل په حقیقت کې د خپلو ستونزو له مسوولیت لاس په سر کېدل او خپلې خځلې د بل هېواد ځمکې ته د اچولو په مانا دي.

پهدا مهال د برتانیا د بهرنیو چارو وزارت بي بي سي ته ویلي، د بنګله دېش د بهرنیو چارو وزیر څرګندونو ته کوم غبرګون نه لري او په دې تړاو به کومه نوې بیانیه خپره نه کړي.