امریکا کې پر یهودي کلیسا برید؛ یوه ښځه وژل شوې
د عکس سرچینه، Reuters
د امریکا کلیفورنیا ایالت سوېلي او د سن ډیاګو ښار په څنډو کې یوه وسله وال پر یهودي کلیسا برید کړی چې یوه ښځه پکې وژل شوې او د یوې ښځې په ګډون درې نور کسان پکې ټپيان شوي.
د امریکا ولسمشر ډونلډ ټرمپ ویلي، دا برید د کرکې له کبله شوی دی. بریدګر نیول شوی.
د سیمې یوه مشر بیل ګور ویلي، په برید کې یوه پېغلوټه او دوه نور کسان هم ټپیان شوي دي.
پولیس وايي، د ۱۹ کلن بریدګر د برید انګیزه لاهم نه ده معلومه شوې.
برید د شنبې په ورځ څه کمې ۱۱ بجې شوی دی.
د یهودانو کلیسا معمولاً د شنبې په ګهیځ تر ماسپښینه مذهبي مراسم ترسره کوي او په پام کې وه چې یاده کلیسا به د یهودانو د ازادۍ په پار مراسم هم جوړ کړي.
شپږ میاشتې مخکې هم د امریکا پنسلوانیا ایالت کې د یهودانو پر یوه ورته کلیسا برید لږترلږه ۱۱ کسان ووژل چې دا د امریکا په معاصر تاریخ کې پر یهودي کلیسا تر ټولو خونړی برید ګڼل شوی و.
د عکس سرچینه، Reuters
د عکس سرچینه، AFP
د امریکا ولسمشر ډونلډ ټرمپ له برید څو دقیقې وروسته د قربانیانو له کورنیو سره د غمشریکۍ په پار وویل، څېړنې روانې دي، خو ښکاري چې د برید لامل "کرکه" وي.
تېر کال امریکا کې د یهود ضد ډلو له خوا د بریدونو د ډېروالي خبر ورکړل شوی.
په ۲۰۱۷ کال د امریکا ویرجینیا ایالت په چارلوټزوېل کې د توکمپالو او سخت دریځو ډلو د لاریونونو څپه وه چې سلګونه کسانو د یهودانو ضد مشالونه ورسره ولېږدول چې بیا وروسته په اړودوړ او د کیڼ اړخو په لانجه کې یوه ښځه هم ووژل شوه.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
