بنګله دېش پلازمېنه ډاکه کې اور ۷۸ کسان وژلي

د بنګله دېش پلازمېنه ډاکه کې د اور له امله تر ۷۸ کسان وژل شوي دي. اور د یوې تاریخي سیمې داسې ودانۍ کې لګېدلی چې یوه پوړ کې یې د کیمیايي توکو ګودام هم دی. ځايي رسنۍ وايي، اور نږدې ودانیو ته هم په چټکۍ رسېدلی دی.

اور تېره شپه ځايي وخت نږدې دوولس بجې ولګېد. اور وژونکي یې د له منځه وړلو هڅه کوي، خو تنګې کوڅې او کمې اوبه هغه څه دي چې لا یې هم لمبې روانې دي.

ویل کېږي د واده ورا ته هم دې اور کې مرګ ژوبله اوښتې ده.

د بنګله دېش د اور وژنې مشر علي احمد وايي، فکر کېږي چې د ګاز ډبې له امله اور لګېدلی او بیا د لومړنیو کیمیايي توکو ګودام ته خور شوی دی.

اور دومره تېز خور شوی چې د خلکو بچېدلو امکان هم نه و.

د چوک بازار په نوم دا سیمه چې تاریخي ده او د پېړیو پخوانۍ کوڅې پکې دي، لارې یې تنګې دي او یو بله ودانۍ خپلو کې تر یو انچ واټن لري.