تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
محصلینو د 'توکمپال' مهاتما ګاندي مجسمه ونړوله
د ګانا پلازمېنې اکرا له يوه پوهنتونه د هند خپلواکۍ مشهور مبارز مهاتما ګاندي یوه مجسمه نړول شوې ده.
په ۲۰۱۶ کال کې د دغه پوهنتون یو شمېر استادانو او محصلینو د دغې مجسمې لرې کولو کمپاین له هغه لږ وروسته پیل کړ، چې د هند پخواني ولسمشر پرناب مکرجي د دغې مجسمې پرانیسته وکړه.
کمپاین کوونکو ادعا کوله چې ګاندهي (توکمپال) و او افریقايي اتلانو ته باید لومړیتوب ورکړل شي.
ګانا حکومت هغه مهال ویلي و، مجسمه به بل ځای کې ولګوي.
محصلینو او استادانو بي بي سي ته وویل دغه مجسمه چې د پوهنتون لیلیې سره نصب شوې وه، د چارشنبې پر ورځ لرې کړل شوه.
پوهنتون مسوولینو د مجسمې لرې کول تایید کړي او په وینا یې د بهرنیو چارو وزارت او سیمه ییز ادغام د دغې چارې مسوولیت لري.
د قانون یوه محصل نانا ادوما اساري ادي بي بي سي ته وویل: د هغه مجسمې اېښودلو مانا دا ده چې موږ هم هغه څه کوو چې ده کول او که دی رښتیا هم توکمپاله و نو بیا زه فکر نه کوم دا به مناسبه وي چې موږ یې دلته پوهنتون کې مجسمه ولرو.
مهاتما ګاندهي د ۲۰ پېړۍ له خورا مشهورو شخصیتونو یو و. د هغه د شهرت یو لوی لامل پر هند د برتانوي واکمنۍ پر مهال د عدم تشدد مبارزې مشري وه.
خو کله چې د ځوانۍ پر مهال هغه په سویلي افریقا کې ژوند کاوه نو د تور پوټکو خلکو په اړه یې داسې څرګندونې کړې وې چې اوس ناندریزې بلل کېږي.
نوموړي په خپلو لیکنو کې تور پوټکي افریقایان د 'کافر ' په نامه یاد کړي چې د توکمپالنې په مانا تعبیریږي. نوموړي دغه راز ویلي چې هندیان په غیر عادي توګه تر تور پوټکو افریقایانو غوره خلک دي.
