تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
واشنګټن له کویت، بحرین او اردنه پاټریوټ سیستم بېرته اخلي
د امریکا متحدو ایالتونو له کویت، بحرین او اردن نه له دې کبله د "پاټریوټ" توغندي دفاعي سیستم بېرته اخیستل غواړي، چې د روسیې او چین پر ممکنه ګواښونو خپل پام ورټول کړي.
کویت د امریکا دا پرېکړه "یو روټین کار" بللی، چې په وینا یې، د کویټ اړوند پاټریوټ سیستم یې خپلې پولې ساتلی شي.
خو اردن او بحرین بیا د امریکا پر دغه ګام کوم غبرګون نه دی ښودلی.
پاټریوټ سیستم د الوتکو او توغندیو د مخنیوي لپاره کارول کېږي.
له منځني ختیځه څلور پاټریوټ سیستمونه بېرته اخیستل کېږي: دوه له کویته او یو یو له اردن او بحرین نه.
فرانس پرېس خبري اژانس د یوه امریکايي چارواکي له خولې د نوم نه ښودلو په شرې ویلي، د پرېکړې موخه دا ده چې "له منځني ختیځ لرې توازن ستون کړای شي".
دا ګام د واشنګټن د هغو هڅو په درشل کې اخیستل شوی چې امریکا د روسیې او چین له خوا د ګواښونو ډېرېدو وېره احساس کړې ده.
یوه امریکايي چارواکي فرانس پرېس خبري اژانس ته ویلي: "څلور واړه سیستمونه به یوه دوو میاشتو کې امریکا ته ستانه کړل شي، هلته به وساتل او نوي کړل شي او بیا به نصب کړل شي."
د نوموړي ټینګار دا دی چې واشنګټن به خپله ټلواله هېڅکله په کمزوري حالت کې پرې نه ږدي، بلکې د ملاتړ لپاره به یې نور دفاعي وسایل ورکړي.
"وال سټریټ جورنال" لومړنی خبري اژانس و چې له منځني ختیځه د امریکا دفاعي سیستم بېرته اخیستو پلان یې افشا کړ.
د ایران او امریکا ترمنځ ترینګلتیا په ډېرېدو ده، چې په لړ کې یې ولسمشر ټرمپ د ملګرو ملتونو عمومي اسامبلۍ ته په وینا کې پر ایران سخت لفظي بریدونه وکړل.
پاټریوټ توغنديو نه یوازې د منځني ختیځ په یادو هېوادونو کې د امریکايي اډو او بنسټونو ساتنه نه کوله، بلکې په سیمه کې یې د امریکا د ملګرو دفاعي ملاتړ کاوه.
