تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
سعودي د کاناډا لویو ښارونو ته الوتنې درولې
سعودي عربستان له کاناډا سره د بشري حقونو په تړاو د اختلاف له کبله ریاض د کاناډا لویو ښارونو ته سفر او کاناډايي پوهننتونونو ته د سعودیانو استول درولي دي.
سعودي وايي، د دغه خلیجي سلطنت په کورنیو چارو کې د لاسوهنې له امله له کاناډا سره ټوله نوې سوداګري او پانګونه ځنډوي.
د سعودي د بهرنیو چارو وزارت په یوه لړۍ ټوېټونو کې وايي، د کاناډا سفیر له هېواد اېستل غواړي او له اوتاوا هم خپل سفر ور بولي.
د ریاض دا ګام له هغه وروسته دی چې کاناډا وویل، د سعودي له خوا د ځینې انساني حقونو د فعالو د نیونې له امله "سخت خواشیني" دي.
په نیول شوو فعالو کې سعودي توکمه امریکايۍ سمرا بداوي هم ده، چې د ښځو د حقونو لپاره یې هڅې کولې.
مېرمن بدوي پر سعودیو مېرمنو د نارینه وو د قیمومت یا سرپرستۍ نظام د پای ته رسېدلو غوښتنه کوي.
د بهرنیو چارو وزارت وايي، په خپلو چارو کې هیڅ ډول لاسوهنه نه مني.
دوی د کاناډ د بهرنیو چارو وزارت د تېرې اونۍ بیان ته اشاره کوي چې پکې له ریاض غوشتل شوي د مدني ټولنې او ښځو چارو فعالې سملاسي خوشې کړي.
د سعودي وزارت د کاناډا دغه دریځ پر سلطنت یو برید بولي وا وايي اوس به
- د دواړو هېوادونو ترمنځ ټوله نوې سوداګري او پانګونه ځنډېږي.
- د کاناډا سفیر نه مني او ترې غواړي چې څلرویشتو ګړیو کې دغه هېواد پرېږدي.
- کاناډا کې پر خپل سفیر غږ کوي چې ریاض ته ستون شي.
- د نورو ګامونو پورته کولو حق هم د ځان لپاره خوندي بولي.
د کاناډا حکومت تراوسه د سعودي د دې ډيپلوماټیکو قیوداتو په هکله څه نه دي ویلي.
سعودي کې د مېرمنو نیول له هغه پرمختیاپال انځور سره ټکر دی چې سږ کال د دغه هېواد د ولیعهد محمد بن سلمان په مشرۍ پلان شوی دی.
نوموړي تېر کال له هغه وروسته ډېر په دې وستایل شو چې ویې ویل د جون له ۲۴ به په دغه هېواد کې له مېرمنو د لسګونو کلونو موټروانۍ بندیز لرې شي.
سعودي کې د ښځو حقو په برخه کې فعالو- ان هغوی چې اوس بندۍ دي- دغه پرېکړه وستایله.
خو له دې بندیز لرې کېدلو څو اونۍ مخکې سعودي د ښځو د حق غوښتنې اووه فعالې ونیولې.
د سعودي حکومتي تلوېزون وايي، دغه مېرمنې له یوه بهرني هېواد سره د اړیکو له امله نیول شوې دي.
خو مېرمنې لا هم وايي چې په دغه هېواد کې به د هغو قوانینو د پای ته رسولو لپاره مبارزه کوي چې له مېرمنو سره توپیري چلن بلل کېږي.
ښځې باید حجاب ته ژمنې اوسي، له نامحرم لرې اوسي، له نارینه سرپرست- پلار، مېړه یا ورور- یې ملګری یا اجازه لیک ولري که سفر، کار یا روعتيايي خدمتونو ته لاسرسی غواړي.
د سعودي ولیعهد د بډو ضد کمپاین له امله هم وستایل شو، چې پکې نوموړي تېر نومبر لسګونه شهزادګان، د حکومت وزیران او سوداګر ونیول او بیا د نږدې ۸۰ یا ۱۰۷ میلیارد ډالرو په بدل کې خوشي شول.
