تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
تایلنډ: غوټه وهونکو له سمڅې څلور ایسار زلمیان را و ایستل
تایلنډي چارواکو ویلي، د فوټبال د هغو ۱۲ ماشومانو او د هغوی د روزونکي د ژغورلو د عملیاتو له پیل وروسته یې، نن څلور ځلمیان له سمځې اېستلي دي.
دغه ماشومان له دوو اونیو راهیسې یوه سمڅه کې بند پاتې دي.
هلته په تېرو څو ورځو کې د اوبو له کبله د ژغورنې عملیات له خنډ سره مخامخ شوي وو.
د دغو ماشومانو د ژغورونکې ډلې څارونکي ویلي، ۱۸ غوټه وهونکي د ماشومانو د ژغورنې عملیاتو کې ګډون کړي.
چارواکو ویلي، اوس ښايي له سمڅې د میلیونونو لیترو اوبو په راوتلو سره د ژغورنې عملیات یوڅه اسانه شي.
د چیانګ رای سیمې، چې دغه سمڅ پکې ده، چارواکي نارونګاسک اوسوتانکورن ویلي، اوس د هوا حالات ښه بلل شوي، خو لاهم وېره شته چې موسمي بارانونه دې وشي او سمڅې ته تنګه لار بیا اوبه بنده کړي.
د تېرې جون له ۲۳مې راهیسې ژغورونکي دغو ماشومانو ته خواړه، اکسیجن او لومړني طبي توکي استوي.
نارونګاسک ویلي: "اوس او راتلونکو څلورو ورځو کې وضعیت دې ته برابرېږي چې ماشومان راوایستل شي."
پلان څه دی؟
ملکي او پوځي ژغورنډلې د ماشومانو او د هغوی د روزونکي د ژغورلې لپاره خطرناکې لارې ته ځانونه سیخ کړي دي.
د سمڅې د ننه د اوبو د وتلو لپاره نور سوري کیندل شوي.
وړاندې ویل شوي وو، که وضعیت همدا ډول دوام وکړي، نو ښايي څو میاشتې دغه ماشومان سمڅ کې پاتې شي.
د تېرې شنبې په ورځ نارونګاسک وویل، ماشومانو د لامبو ځینې مهارتونه زدکړي دي.
پېښه څنګه وشوه؟
د سمڅې له خولې نه څلور کیلومتره لرې د برتانیا یوې ډلې د سمڅې د ننه د دوشنبې په ورځ د دغو ماشومانو څرک ولګاوه.
دغه ماشومان، چې عمرونه یې د ۱۱ او ۱۶ کلونو ترمنځ دي، د یوه څېړنیز سفر پرمهال له خپل روزونکي سره په دې سمڅه کې بند پاتې شول.
د سمڅې ژورو کې د دوی موندلو نژدې لس ورځې وخت واخیست.
