"داعش افغانستان کې په سرخوږي بدلېږي"

ډېلي ټلېگراف ورځپاڼې افغانستان ته د نورو بريتانوي سرتېرو د استولو په تړاو ليکلي،افغان پلازمينه کابل کې تېره مياشت د غبرگو چاودنو په گډون د توندلارو وروستيو بريدونو دا اندېښنې ډېرې کړي چې اسلامي دولت نومې ډله اوس افغانستان لپاره په لوى گواښ بدلېدونکې ده.

د ورځپاڼې په وينا دې گواښ برتانيا اړه کړه چې افغانستان ته د نورو سرتېرو د استولو چمتو والى وکړي.

د بريتانيا د دفاعي چارو جرگه گۍ مشرې جوليان لويس ورځپاڼې ته ويلي ناټو او برتانيا هوډ لري چې د طالبانو لاس ته د افغانستان بيا نه پرېوتل باوري کړي.

گارډين:

بريتانوۍ گارډين ورځپاڼې "بريتانيا افغانستان کې د خپل سرتېرو شمېر دوه برابره کوي" تر سرليک لاندې يو مطلب خپور کړى او وايي دا سرتېري د ډونالد ټرمپ په غوښتنه په داسې مهال کې استول کېږي چې برتانيا په خپله د دفاعي بوديجې له فشارونو سره سره له دغه هېواده بهر په ٢٥ عملياتو کې ښکېله ده.

ورځپاڼه وايي برتانيا د پوځيانو په گومارنه او ساتنه کې له ستونزو سره مخامخ ده.

د دفاع وزارت نوي رپوټ کې راغلي چې د برتانيا پوځ کې د تېر کال پرتله ټول ټال د ٢٩٠٠ سرتېرو کمى راغلى.

خو دفاع وزارت ويلي ژمن دي چې سرتېري يې په هره کچه اړين مهارتونه ولري او په نړۍ کې يې مخکښ پوځ د زياتېدونکو نړيوالو گواښونو سمه مقابله وکړي.

هندوستان ټايمز:

هندوستان ټايمز په اسام ايالت کې د اعتراضونو په پلمه د دغه هېواد د تابعيت په قانون کې رامنځته شوي بدلون ته کتنه کړې چې د احتجاجونو لامل هم شوي دی.

رامنځته شوى بدلون د هند گاونډيو هېوادونو لکه بنگله دېش پاکستان او ان د افغانستان مذهبي لږکيو لپاره د هند تابعيت ترلاسه کول شوني کوي.

قانون کې دغه بدلون د ځينو اندېښنې را پارولي چې د بنلگه دېش هندوان به په لوى شمېر کې هند ته ورمات شي.