تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
حماس او فتح له لس کلن مخالفتونو وروسته هوکړې ته ورسېدل
حماس وايي له خپل سيال غورځنگ "فتح" سره د سولې هوکړې ته رسېدلى.
دا هوکړه د دواړو ترمنځ هغه لس کلن وېش ته د پاى ټکى ږدي چې د فلسطينۍ کورواکې ادارې د ولکې سيمه يې په دوو برخو ووېشله.
حماس چې پر غزې تړانگې واکمن دى وايي، د هوکړې جزييات به نن وروسته په ډاگه شي خو د فتح غورځنگ لا په دې تړاو څه نه دي ويلي.
د دغو د واړو فلسطيني ډلو ترمنځ د پخلاينې منځگړتوب مصر کاوه.
حماس په ٢٠٠٦ م کال کې پارلماني ټاکڼې گټلې وې او يو کال وروسته پر تگلارو د اختلافونو له امله له فتح غورځنگ سره خونړيو نښتو کې ښکېل شو. پايله دا شوه چې حماس غزه تراډه ونيسي او د فتح گوند واک لوېديځې غاړې پورې محدود شي.
د حماس وياند "سميع ابو زوهري" تېره ورځ په قاهره کې وويل خبرې جدي پړاو ته رسېدلي دي.
تېره مياشت حماس د هغې شورا ړنگولو ته سلا شو چې د غزې اداري چاري يې پرمخ وړې.
حماس په ٢٠٠٧ م کال کې د فلسطين خپلواکې ادارې ته وفادار ځواکونه له غزې وشړل او اسراييلو چې حماس ترهگره ډله بولي، سيمه کلابنده کړه.
اسراييلي حکومت او مصر غزې تراډې ته د توکو د لېږد را لېږد او د خلکو د تگ راتگ بهير هم محدود کړ.
سمندر ته د غزوالو لاس رسى هم کم شو. د حماس او په لوېديځه غاړه کې د مېشتې فلسطيني کورواکې ادارې ترمنځ وېش او توپيرونه لا ژور شول.
مخالفتونه د دې لامل شول چې فلسطيني اداره غزې ته مالي مرستې ودروي او له اسراييلو هم وغواړي چې پر سيمې برېښنا کمه کړي.
