تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
نوازشریف احتساب محکمې ته حاضر شوی
- Author, خدای نور ناصر
- دنده, بي بي سي، اسلام اباد
د پاکستان پخوانی لومړی وزیر نوازشریف نن سه شنبه ددغه هیواد یوه احتساب محکمې ته حاضر شوی، چې لومړی ځل يې ښاغلی شریف د سپټمبر پر ۱۹مه وربللی و، خو هغه ورته حاضر شوی نه و.
پخواني لومړي وزیر دغې محکمې ته ویلي، ځکه پر ۱۹مه نېټه ورته حاضر نه شو، چې د خپلې مېرمنې د درملنې په موخه لندن کې و.
د اسلام اباد د احتساب محکمې ته پخوانی لومړی وزیر نوازشریف سهار مهال حاضر شو، چې د هغه په موجودګۍ کې یواځې دوه دقیقې اورېدنه وشوه او هغه ته يې د بېرته تلو اجازه ورکړه. یادې محکمې پر پخواني لومړي وزیر نوازشریف د تور لګاوي لپاره د اکتوبر ۲مه نېټه ټاکلې، چې په یاده نېټه به بیا هم ښاغلی شریف همدې محکمې ته حاضرېږي.
د پاکستان سترې محکمې ددغه هیواد د احتساب ادارې (نېب) ته امر کړی و، چې د احتساب یادې محکمې ته دي د پخواني لومړي وزیر ضد د درغلۍ درې ماخذونه واستوي، چې یو هم په بهر کې د پټو شتمنیو، دویم د العزیزیه پولادو مل او د رېیم په لندن کې د کور په تړاو و، چې د سترې محکمې په خبره پکې درغلي ښکاري.
یادې محکمې له دې سره د نوازشریف د دوو زامنو حسن نواز، حسین نواز، د هغې د لور مریم نواز او زوم صفدر د نیولو امر هم کړی، خو ددغه نیولو ضمانت يې تر نیولو وړاندې هم کېدلی شي.
د پاکستان سترې محکمې ښاغلی شریف د روان عیسوي کال د جولای په ۲۸مه نېټه له دندې ګوښه کړ، چې اوس يې پر ځای شاهد خاقان عباسي د پاکستان لومړی وزیر دی.
که څه هم د ښاغلي عباسي تعلق هم د نوازشریف له ګوند سره دی، خو دغه واکمن ګوند پسې شا د پاکستان پر پوځ او استخباراتو تور پورې کوي، چې د پخواني لومړي وزیر د لري کېدو تر شا د هغوی لاس دی.
