تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
ټرمپ د خپلې لانجمنې خیریه مؤسسې تړلو ژمنه کړې
د امریکا ولسمشر ډونلډ ټرمپ ویلي، خپله لانجمنه خیریه مؤسسه به وتړي، خو وايي د مؤسسې د ځینو احتمالي سرغړونو په اړه به څېړنه جاري وساتي.
نوموړي ویلي، هیله یې دا ده چې دغه کار به له "هېڅ راز ګټو سره په ټکر کې نه وي".
د نیویارک ښار څارنوال د ټرمپ په مؤسسه کې د ځینو مشکونو "سرغړونو" پر څېړلو بوخت دی. خو ټرمپ وايي مؤسسې یې هېڅ ډول سرغړونه نه ده کړې.
د لوی څارنوال دفتر ویلي منتخب ولسمشر ته نه ښايي چې د څېړنو په جریان کې خپله خیریه وتړي.
ټرمپ د شنبې په ورځ وویل "مؤسسې د تېرو کلونو په درشل کې د میلیاردونو ډالرو په ارزښت ډېر لوی او ښه کارونه کړي او له مستحقو خلکو سره یې همکاري کړې ده، د ښو کارونو یوه بېلګه یې د مخکېنیو جنګېدونکو ځواکونو ملاتړ دی."
په پام کې ده چې د راتلونکې جنورۍ میاشتې پر ۲۰مه ډونلډ ټرمپ د امریکا د ختمېدونکي ولسمشر بارک اوباما ځای ناستی شي.
ټرمپ د امریکا ۴۵ ولسمشر دی.
دغه میلیاردر جمهوریپال د تېرې نومبر میاشتې پر اتمه د امریکا ولسمشریزو ټاکنو کې خپلې ډیموکراټې سیالې هیلیري کلنټن ته ماتې ورکړه.
په تېره سپټمبر میاشت کې د نیویارک څارنوال ایریک شنایدرمن وویل، دفتر یې غواړي ډاډمن شي چې د ټرمپ خیریه ټولنه "په نیویارک کې د خیریه مؤسسو له قانون سره سم فعالیتونه کوي".
ښاغلي شنایدرمن له سي ان ان خبري اژانس سره په خبرو کې هغه وخت اندېښنه ښودلې وه چې ګني د ټرمپ مؤسسه په ځینو سرغړونه کې ښکېله ده.
د امریکا خبري رسنیو وویل، د شنایدرمن دفتر له تېرې جولای میاشتې راهیسې د ټرمپ د مؤسسې د سرغړونو پر دوسیې کار کوي.
پر دغې مؤسسې تور دی چې ګني په ۲۰۱۳ کال یې د فلوریډا ایالت د جمهوریپالې لویې څارنوالې پام بونډي بنسټ ته پیسې ورکړې دي.
ویل شوي چې دغه بنسټ ته له ۲۵۰۰۰ ورکړل شويو ډالرو سره هم مهاله، د اغلې بونډي دفتر زړه نازړه وه چې ایا د ټرمپ پوهنتون د درغلۍ په اړه څېړنه پیل کړي او که نه.
د درغلیو څېړنه وروسته هېڅ پیل نه شوه، خو وروسته اغلې بونډي دا رد کړه چې ګني پیسې یې ترلاسه کړې دي.
