د کالې ځنګل کمپ لسګونو ماشومانو تر شنه اسمان لاندې شپه تېره کړه
د عکس سرچینه، AP
د فرانسې په کالې بندري ښار کې د ځنګل نومي کمپ لسګونه بې سرپرسته ماشومان تېره شپه تر شنه اسمان لاندې پاتې وو.
تېره ورځ فرانسوي چارواکو ویلي و، له دغه کمپه یې ټول کډوال ایستلي دي.
د مرستندویانو په وینا ۱۰۰ ماشومانو په دغه کمپ کې تېره شپه بې سرپناه تېره کړه، خو د ځايي ادارې یوې چارواکي په وینا د دغو ماشومانو شمېر ۶۸ دی.
د ځايي ادارې مشرې پابیان بوچیو دا ادعا هم کړې، چې دغو ماشومانو کې ډېری اصلاً د ځنګله کمپ اوسېدونکي نه دي.
حکومتي چارواکي وايي، د دوشنبې له ورځې راهیسې یې له دغه کمپه ۵۶۰۰ کسان نورو مرکزونو ته لېږدولي دي.
د عکس سرچینه، EPA
دې کې ۱۵۰۰ هغه نابالغ کسان هم شامل وو، چې له کانتینرونو یوه رغول شوي مرکز ته لېږدول شوي وو او د فعالانو په وینا اوس دغه مرکز ډک شوی دی.
د ځنګل کمپ ډېری اوسېدونکو غوښتل بریتانیا ته لاړ شي او له همدې کبله دغه کمپ اروپا کې د کډوالۍ بحران پر یوه سمبول بدل شوی و.
د کمپ ویجاړونکي کارګر د هغو کېږدیو پاتې شوني پاکوي، چې ویل کېږي له کمپه تلونکو کډوالو اور ورته کړی و.
بل لور ته د یوې بریتانوۍ خیریه ټولنې ' کالېز ایکشن ' کارولین ګرېګوري وايي، تېره شپه په دغه کمپ کې ۱۰۰ داسې ماشومان پاتې وو، چې سرپرست یې نه درلود. هغې د سې شنبې په ورځ بي بي سي ته وویل:
''موږ فرانسوي چارواکو ته زارۍ کولې، چې د کډوالو ماشومانو لپاره یو څه وکړي، خو هغوی هېڅ و نه کړل. ''
د عکس سرچینه، Getty Images
رضاکارو په یوه ګودام کې، چې د کډوالو مسایلو لپاره ځانګړی شوی و، سرپناه وموندله.
یو شمېر دغه کډوال بیا له هغه مرکزه بهر پر ځمکه ویده شوو، چې د تېرو دریو ورځو اوږدو کې له کمپه د ایستل کېدونکو کډوالو نومونه په کې ثبت کېدل.
یوه افغان ماشوم اې ایف پي خبري اژانس ته وویل:
''زه د هغو کم عمره کډوالو په کتار کې یم، چې انګلستان ته ځي، زما کورنۍ هلته ده. ''
بل لور ته فرانسوي چارواکي وايي، دوی اوس هم په خیمو کې د هغو کډوالو لټون کوي، چې نه غواړي له دغه ځایه ووځي.
مېرمن بوچیو وايي، هغه کسان چې تېره شپه یې په کمپ کې تېره کړې، د فرانسې له نورو سیمو دغه ځای ته راغلي دي.
د عکس سرچینه، AFP
له دې مخکې هغې ویلي و، چې له کمپه د کډوالو ایستلو بهیر بشپړ شوی دی.
د هغې په وینا دغه ۶۸ ماشومان به د فرانسې نورو سیمو کې مرکزونو ته ولېږدول شی، خو وايي د منلو مرکزونو ته به د نورو کډوالو لېږدولو لپاره بسونه نه ورکول کېږي.
هغې خبرداری ورکړ، چې کمپ به د هغو کسانو لپاره پر تم ځای بدل نه شي، چې غواړي له دغې لارې د منل کېدو مرکزونو کې ځای ومومي.
مېرمن بوچیو وايي، تر دوشنبې پورې به دغه کمپ په بشپړه توګه ویجاړ کړل شي.
د کمپ ویجاړولو عملیاتو بهیر کې له ۱۲۰۰ ډېر پولیس د امنیت ساتلو لپاره ګومارل شوي وو.
دغه کمپ ته ځايي خلکو په ښه سترګه نه کتل او بریتانیا ته په لاریو کې د کډوالو تګ مخنیوي لپاره په کې هر وخت د ګڼو سرتېرو ساتلو ته اړتیا وه.
