مانچسټر یونایټډ یو وار بیا مینه وال خواشیني کړل
د انګلستان مخکښ لیګ دویمه اونۍ د یکشنبې په ورځ درې لوبې ترسره شوې.
لومړۍ لوبه د هل او سټوک تر منځ وشوه.
دا لوبه چې د هل په کور دننه کې ترسره شوه د دواړو لوبډلو تر منځ ۱-۱ مساوي پای ته ورسېده.
د لوبې په ۱۴مه دقیقه کې د کوربه لوبډلې هل منځ ډګري لوبغاړي جیمز چېسټر ته د لوبڅار له خوا سور کارت وښوول شو او له لوبې وایستل شو.
د هل لپاره دا ګرانه وه چې نژدې ۷۵ دقیقې دې په لسو لوبغاړو ولوبېږي.
خو د لوبې د لومړۍ نیمايي تر پای ته رسېدو څو دقیقې وړاندې د دوی بریدګر لوبغاړي جېلاوېچ ګول وکړ او خپله لوبډله یې یو صفر مخته کړه.
د لوبې په ۸۵مه دقیقه کې د سټوک لوبډلې دفاعي لوبغاړي شاکراس ګول وکړ او لوبه یې ۱-۱ برابره کړه او په دې ډول لوبه برابره پای ته ورسېده.
سټوک د خپلې سیالې لوبډلې په ګول ۱۹ بریدونه وکړل او هل بیا د سټوک پر ګول یوازې ۹ بریدونه کړي و چې یوازې یو يې په ګول بدل شو.
ټاټنهم – کیو پي آر
دویمه لوبه د ټاټنهم په کورني لوبغالي وایټ هارټ لېن کې ترسره شوه چې ټاټنهم په کې سیالې لوبډلې کیو پي آر ته ۴-۰ ماته ورکړه او خپله دویمه لوبه یې هم وګټله.
د ټاټنهم له لوري نارېک چادلي دوه، اېرېک ډایر او اېمانوېل اډېبایر یو یو ګول وکړ.
دا د ټاټنهم لپاره لویه لاسته راوړنه ده چې د لوبیز کال په پیل کې یې لوبغاړي ښه لوبېږي.
لوبه کې له پیله تر پایه د ټاټنهم لوبډله برلاسې وه.
دوی اوس ۶ پواینټه لري او د نمرو جدول په سر کې راځي.
مانچسټر یونایټډ – سنډرلېنډ
مانچسټر یونایټډ چې خپله لومړۍ لوبه یې بایللې وه دا دی په دویمه لوبه کې یې خپل مینه وال خواشیني کړل.
سنډرلېنډ د پریمیر لیګ له کمزورو لوبډلو شمېرل کېږي او داسې انګېرل کېده چې ښايي یونایټډ خپله دویمه لوبه په اسانۍ وګټي.
خو داسې ونه شول او لوبه ۱- ۱ برابره پای ته ورسېده.
د لوبې لومړی ګول د یونایټډ خوان مټا وکړ خو څو دقیقې وروسته بیا د سنډرلېنډ جېک روډوېل ګول وکړ او لوبه یې مساوي کړه.
د شنونکو په آند که مانچسټر یونایټډ همداسې لوبېږي نو ښايي د لوبیز کال تر پایه به آن په لومړیو لسو لوبډلو کې هم ځای پیدا نه شي کړای.
