تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
افغان ۲۰ کلنو فوټسال لوبډله د اسیایي اتلولۍ پایلوبې ته ووته
- Author, خوشحال تایب
- دنده, بي بي سي
د افغانستان د فوټسال شل کلنو ملي لوبډلې د اسیا اتلولیو پایلوبې ته لار ومونده. افغان لوبډلې تاجکستان ته په ماتې ورکولو سره د اسیا فوتسال شل کلنو په مهمو سیالیو کې د لوبېدو جواز ترلاسه کړ.
افغان لوبډلې وکولای شول تاجکستان ته ۴ ـ ۱ ماتې ورکړي او د اسیا فوټسال شل کلنو په مهمو سیالیو کې د ګډون جواز ترلاسه کړي.
دغه سیالۍ د ډیسبمر میاشتې په لومړۍ نېټه په ازبکستان کې پیل شوې وې. افغان لوبډله له ترکمنستان او ایران سره په الف ګروپ کې وه چې له هرې ډلې یوې لوبډلې مخامخ د اسیا جام ته لار موندله.
دوه لوبډلې چې دویم شوې وې باید د پلې آف په ډول باید سیالي سره وکړي، چې ګټونکې لوبډله به د اسیا جام سیالیو ته لار مومي.
افغان لوبډله وتوانېده په دغه پړاو کې د تاجکستان لوبډلې ته ۴ ـ۱ ماتې ورکړي او په لومړي ځل یې د اسیا جام اتلولیو ته مخه کړه.
د افغانستان لپاره حسین موسوي دوه ګولونه، حمید حسیني او فرزاد محمدي هم یو یو ګول وکړ.
وړاندې د فوټبال فدراسیون چارواکو ویلي وو، د افغانستان د فوټسال په ۲۰ کلونو ملي لوبډلې کې پنځلس تنه لوبغاړي لوبه کوي چې له کابل، هرات، کندوز او په ایران کې مېشت یو شمېر افغان کډوال پکې ګډون لري.
افغان لوبډلې په دغه پړاو کې درې سیالۍ ترسره کړې. په لومړۍ لوبه کې یې ترکمنستان ته ۵ ـ صفر ماتې ورکړه. دویمه لوبه یې ایران ته ۴ ـ ۲ وبایلله خو وروستۍ او برخلیک جوړونکې لوبه یې له تاجک لوبډلې ۴ ـ ۱ وګټله.
