ټاټا او ایربس هند کې پوځي الوتکه جوړوي
د عکس سرچینه، AIRBUS
د هند ټاټا د شرکتونو ګروپ پخپل لومړني ګام کې یوه پوځي الوتکه جوړوي.
د هند حکومت د پنجشنبې په ورځ وویل، ټاټا ګروپ له ایربس سره په ګډه د هندي پوځ لپاره د سي -۲۹۵ ډوله ترانسپورتي پوځي الوتکې جوړولو هوډ کړی دی.
د هند لوېدیځ ګوجرات ایالت کې پر دې پروژې به نژدې یو میلیارد ډالر لګښت راځي. په پام کې ده چې د هند لومړی وزیر نرېندرا مودي به د یکشنبې په ورځ د الوتکې د جوړېدو پروژه پرانیزي.
د هند دفاع وزارت په یوه خبرپاڼه کې ویلي: "دا پخپل ډول کې لومړنۍ پروژه ده چې د هند یو خصوصي شرکت یوه پوځي الوتکه جوړوي".
تر اوسه د هندي حکومت په ملکیت هندوستان ایرونوټیکس شرکت د وسله وال ځواک لپاره الوتکې جوړوي.
هند هوډ کړی چې د نړۍ له ډېرو وسلو واردوونکو هېوادونو شي او نوی ډیلی له لسیزو راهیسې تر ډېره د پوځي توکو له اړخه د روسیې په څېر پر هېوادونو تکیه کوي.
خو په تېرو څو کلونو کې، د بهاراتیا جاناتا ګوند په مشرۍ د هند حکومت د وارداتي توکو پر ځای د خپل سیمه ییز تولید ډېرولو هڅه کوي.
د ټاټا-ایربس دې پروژه کې کارپوهان پر دې اند دي چې هند غواړي پر یوه نړیوال صنعتي مرکز واوړي.
دفاع وزارت ویلي، دا معامله به د الوتنې صنعت کې د هند د خصوصي سکتور ښکېلولو لپاره ښه فرصت وي.
د پروژې د یوې برخې په توګه، هندي حکومت د ۲۰۲۱ کال سپتمبر میاشت کې اسپانیا کې د ډینفس او سپېس د ایربس سي - ۲۹۵ د ۵۶ پوځي الوتکو رانیولو هوکړه کړې وه.
دفاع وزارت وايي، دا الوتکې به د هند هوايي پوځ کې د کارېدونکو بریتانیا جوړو پخوانیو (افرو) الوتکو ځایناستې شي. له دې الوتکو به ملکي موخو کې هم ګټه اخیستل کېږي.
ایربس به د ۲۰۲۳ کال سپتمبر او د ۲۰۲۵ اګسټ میاشتې ترمنځ ۱۶ الوتنې ته چمتو شوې الوتکې ترلاسه کړي، خو پاتې به یې د ټاټا ګروپ په مټ د ګوجرات فابریکه کې جوړې شي.
د هند دفاع وزارت ویلي "اټکل دی چې هند جوړه لومړنۍ الوتکه به د ۲۰۲۶ کال سپتمبر کې بشپړه شي".
