پښتونخوا او سېند کې بارانونو او سېلابونو مرګژوبله اړولې

د خیبر پښتونخوا ایالت په بېلا بېلو سیمو کې د پشکال ګڼو بارانونو له کبله له تېرو دوو ورځو راهیسې د ښځو او ماشومانو په ګډون نژدې لس کسان وژل شوي او ۱۸ نور ټپیان دي.

له طبیعي پېښو سره د مبارزې ادارې ځايي چارواکي وايي، له ګڼو بارانونو وروسته سیمه کې سیلابونه راوتلي چې له کبله یې د سر او مال زیان اوښتی دی.

بل لور ته د پاکستان کراچۍ ښار کې هم د پشکال ګڼو بارانونو د سر او مال زیانونه اړولي دی.

ځايي چارواکي وايي، تر اوسه دغه ښار کې له باران وروسته د برېښنايي جټکو یا اوبو کې د ډوبېدو له کبله نهه کسان وژل شوي دي.

په داسی حال کې چې کاروباري ښار کراچۍ کې لا هم د باران اوبه د ښار پر سړکونو، بازارونو او لارو کوڅو کې ډنډ ولاړې دي، د هواپېژندنې چارواکو په دې ښار کې تر چار شنبې پورې د نور باران اټکل هم کړی دی.

بل لور ته د دوشنبې پر ورځ د سخت اورښت له کبله سند ایالتي چارواکو ځايي تعلیمي ادارو کې رخصتي اعلان کړې وه. ځايي خبریال عرفان خټک وايي، د باران له کبله د ښار ډېری سیمو کې برېښنا پرچاو شوې او د تګ راتګ لارې تړلې وې.