تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
عمران خان خپلې سلاکارې ته د واده وړانديز کړى
- Author, اظهارالله
- دنده, بي بي سي پېښور
د پاکستان تحريک انصاف ګوند وايي مشر يې عمران خان خپلې روحاني سلاکارې "بشرى مانيکا" ته د واده وړانديز کړى.
دغه گوند د يوې وينا پاڼې په خپرولو ويلي د ښاغلي خان له لوري د واده وړانديز شوى خو د آغلې مانيکا له لوري يې ځواب لا نه دى ترلاسه کړى.
د تحريک انصاف گوند وينا د هغه خبر له خپرېدو وروسته مخې ته راغله چې ويل يې گواکې ښاغلي خان دريم واده کړى.
خبر پاڼې د عمران خان واده په تړاو پر رسنيو د خبرونو خپرېدل نا اخلاقي کار بللى.
خبر پاڼه زياتوي د پاکستان د يوې رسنۍ له لوري خپاره شوي دغه رپوټ له امله چې په اټکلونو ولاړ و، ښاغلى خان، بشرى مانيکا او د نوموړې بچيان ځورېدلي دي.
د پاکستان يوې رسنۍ په دې وروستيو کې داسې يو رپوټ خپور کړ چې گواکې عمران خان بشرى مانيکا سره چې موړي ته روحاني سلا مشورې ورکوي، واده کړى.
د تحريک انصاف سرچينې وايي کله چې له عمران خان سره د واده په اړه د آغلې مانيکا پرېکړه مخې ته راشي، نو ښاغلى خان به يې په خپله له ولس سره شريکه کړي.
د پاکستان دغه پخواني وتلي کرېکټ ستوري وړاندې دوه ودونه کړي خو له خپلو دواړو مېرمنو جلا شوى دى.
د عمران خان د واده خبر خپرېدو په اړه پر خواله رسنيو بېلابېل غبرگونونه مخې ته راغلي دي.
ځينو دا کار د يوۀ چا په شخصي چارو کې لاسوهنه بللې، خو بيا ځينې نور د نوموړي د واده په اړه کره مالومات تر لاسه کول د ولس حق بولي.
