تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
بلوچستان کې زرګونه ماشومان پولیو واکسین نه پاتې شوي
- Author, خدای نور ناصر
- دنده, بي بي سي، اسلام اباد
د پاکستان په بلوچستان کې د پولیو یا ګوزڼ ناروغۍ د مخنیوي ادارې سرچینو بي بي سي ته ویلي، دوی د پولیو ضد وروستي کمپاین کې ونشوای کولی په دغه ایالت کې شاوخوا ۱۶ زره ماشومان واکسین کړي.
په دې کې ځینې هغه کوچنیان هم دي چې کورنۍ یې د واکسین مخالف دي.
دا یوازې بلوچستان نه دی چې ځینې کورنۍ نه غواړي ماشومانو ته یې د پولیو ضد څاڅکي ورکړل شي، بلکه له کلونو راهیسې په خیبرپښتونخوا ایالت کې هم ورته کورنۍ شته چې د واکسین مخالفت کوي.
ددغو کورنیو ادعا دا ده چې د پولیو ضد څاڅکي (واکسین) کمپاينونه د غربي هېوادونو دسیسه ده، چې ددوی په خبره له همدې لارې د مسلمانانو ابادي کمول غواړي.
دا ادعاوې ترډېره د دیني عالمانو لخوا مطرح کېږي، او د اوس د پولیو مخنیوي ادارې چارواکي هڅه کوي د همدغو دیني عالمانو له لارې کورنۍ د ماشومانو واکسین کولو ته وهڅوي.
د کوټې د ګوزڼ د مخنیوي ادارې د مسوولینو په خبره په دغو ۱۶زره ماشومانو کې نژدې ۵۰۰۰ هغه کوچنیان دي چې د کورنۍ د مخالفت له امله له واکسین نه پاتې شوي او پاتې نورو ته لاسرسی نه دی شوی.
د کوټې په ګډون د بلوچستان په نژدې ۱۲ ولسوالیو کې دغه کمپاین ترسره شوی و. د چارواکو په خبره په همدې ولسوالیو کې تر پنځو کالو د کمو ماشومانو شمېر نژدې ۱،۶ میلیونه دی چې ډېرو ته د ګوزڼ ضد څاڅکې ورکړل شوي دي.
افغانستان او پاکستان د نړۍ له هغو دوو هېوادونو دي چې لا هم پکې د ګوزڼ ناروغي لیدل کېږي.
د پاکستان په بلوچستان او پښتونخوا ایالتونو او قبایلي سیمو کې که څه هم دغه ناروغي شته، خو تر پخوا یې پېښې کمې شوې دي.
