په سوات کې پاکستاني پوځيان

دا په داسې حال کې ده چې له تېرې شاوخوا يوې اوونۍ راپدېخوا په سوات کې پاکستاني ځواکونو د سرخت دريځو اسلام پالو پرضد سخت عمليات پيل کړي دي .

د پاکستان د پوځ يوه تن وياند منلې چې پوځيان يې تېره ور ځ (سه شنبه، د فبروري درېيمه) د ېنګورې په شاموزيو سيمه کې تښتول شوي دي .

سرچينه زياتوي چې پاکستاني پوځ سيمې ته زيات شمېر پوځيان استولي وو او د ٢٤ ساعتونو لپاره يې له اورپکو سره سخته جګړه وکړه، چې خپل سرتېري د دوی له بنده ازاد کړي، خو په راخوشي کولو کې يې پاتې راغلل .

رپوټونه وايي چې له نښتې وروسته د طالبانو جنګيالي د پوليسو پر يوه مرکز د شپې مهال بريد وکړ او دېرش پوځيان يې يرغمل ونيول .

د رپوټونو په وينا، د مېنګورې شمالي، ختيځې او لوېديځې لويې لارې تړل شوې دي .

د پاکستان پوځ وايي چې د تېرې شنبې راپدېخوا يې د سانګوټا او منګلاوار په نامه سيمې له وسله والو نيولې دي .

بل پلو له تېرې ورځې راهيسې چې په خيبر دره کې وسله والو يو پل والوزواوه، امريکايي ځواکونو په پاکستان کې د خپلو اکمالاتي توکو لپاره د بلې لارې په فکر کې دي چې په افغانستان کې مېشتو امريکايي او ناټو ځواکونو ته اکمالاتي توکي ورسوي .

په افغانستان کې مېشتو نړيوالو ځواکونو ته ډېری توکي د پاکستان له خيبر درې رالېږدول کېږي چې په تېر کې څو ځلې د وسله والو له سختو بريدونو سره مخامخ شوي دي .