نعمت الله کرياب له اسداباده

	د کونړ والي وايي چې له دغو کسانو څخه پوليسو له چاودېدونکيو توکيو ډک د ځانمرګي بريد واسکټ، دوه لاسي بمونه او د پوليسو يوه دريشي ترلاسه کړي دي .

هغه زياته کړه چې ياد شوي کسان تېره ورځ د چارتراشو لرګيو د انتقال د غوښتنليک اخيستلو په پلمه د ولايت د مقام او امنيه قوماندانۍ شاوخوا سيمو ته راغلي وو، د ځاى او د چارواکيو د تګ راتګ وخت يې معلوماوه .

والي وويل چې له دغو کسانو څخه پوليسو له چاودېدونکيو توکيو ډک د ځانمرګي بريد واسکټ، دوه لاسي بمونه او د پوليسو يوه دريشي ترلاسه کړي دي .

بل پلو د مۍ په ٤ د افغانستان د کورنيو چارو وزارت په يوه خپره کړې خبرپاڼه کې ويلي دغو ځانمرگو بريد کوونکو غوښتل چې د غويي پر ١٥ د کونړ ولايت پر امنيه قومندان ځانمرگى بريد وکړي .

د خبرپاڼې پروينا دغه کسان له بريده وړاندې ونيول شول .

دا په داسې حال کې ده چې د اپريل پر ٢٩ په څنگلوري ننگرهار ولايت کې يوه ځانمرگي بريد کوونکي لسگونو کسانو ته مرگ ژوبله واړوله .

بل خوا په کونړ کې مېشت بهرني ځواکونه وايي د بهرنيو ځواکونو او وسله والو طالبانو ترمنځ په نښته کې اووه کسان وسله والو طالبان وژل شوي او يو شمېر نور ټپيان شوي دي .

دغه نښته د ختيځ کونړ ولايت په وټه پور ولسوالۍ کې شوې ده .

په کونړ کې مېشتو امريکايي پوځيانو په يوه خبرپاڼه کې ويلي چې نښته هغه وخت پيل شوه کله چې په نوموړي ولايت کې د ولايتي بيارغاونې يا پي ار ټي ډلې پوځيانو د وټه پور په ولسوالۍ کې پر گزمه بوخت ول .

د خبرپاڼې پروينا دغه کسان د وسله والو طالبانو تر بريد لاندې راغلل، چې بيا وروسته د افغان او ايساف ځواکونو تر بريد لاندې ونيول شول .

خبرپاڼه زياتوي د ايساف او افغان ځواکونو د وسله والو پټنځايونه تر بريد لاندې ونيول چې په پايله کې اووه کسان وسله وال ووژل شول او يو شمېر نور ټپيان شول .

د خبرپاڼې پروينا افغان او ايساف ځواکونو ته هېڅ مرگ ژوبله نه ده اوښتې .

وسله والو طالبانو دغه نښته تاييد کړې او ادعايې کړې چې د ايساف ځواکونو ته يې هم مرگ ژوبله اړولې ده، خو په دې اړه يې نور جزيات نه دي ورکړي .