افغان سرحدي ځواکونه کله ناکله خبر ورکوي چې وسلوال مخالفان پرې له پولې له هاغې خوا څخه بريدونه کوي او له بريده وروسته بېرته اخوا ( پاکستان ) ته اوړي .

په افغانستان کې مېشت امريکايي پوځيان وايي نښته هغه مهال پيل شوه کله چې وسله والو کسانو د افغان او امريکايي پوځيانو پر پنځو سرحدي تهاڼو وسله وال بريدونه وکړل .

دوى دا هم وايي چې په دې نښته کې شاوخوا ١٢ نور وسله وال ټپيان شوي دي، خو خپلو پوځيانو ته يې د مرگ ژوبلې د اوښتو خبره نه ده کړې .

دغه نښته د ختيځ ولايت کونړ په کوړنگل دره کې شوې ده .

بل خوا د څنگلوري ننگرهار ولايت په غني خېلو ولسوالۍ کې د افغان او بهرنيو ځواکونو په عملياتو کې د يوه افغان سرتېري په گډن دوه وسله وال طالبان وژل شوي دي .
په ختيځو ولايتونو کې د ناټو ځواکونو افغان ويند ډاکتر شفيق همدم ويلي چې دغه عمليات د بهرنيو ځواکونو له خوا تېره شپه شوي دي .

ده زياته کړه افغان او بهرنيو ځواکونو دغه عمليات هغه مهال پيل کړل کله چې په سيمه کې د ځانمرگو بريدوو او ماين خښوونکې ډلې د راتگ خبر يې تر گوتو کړ .

د همدم په وينا په نښته کې له دواړو خواوو ډزې وشوې چې په پايله کې يو افغان سرتېرى او دوه کسان مخالفين ووژل شول .

نوموړي د يادو شوو عملياتو په پاى کې د څلورو وسله والو جنگياليو د ژوندي نيولو خبره هم کړې ده .

خو وسله والو طالبانو لا تراوسه په دې اړه څه نه دي ويلي .

په غزني ولايت کې مېشت بهرني ځواکونه وايي د تېرې يکشنبې په ورځ يې په يوه وسله واله نښته کې دوه وسله وال طالبان وژلي دي .

	وسله وال طالبان وايي د غزني د اندړو په سيمه کې يې د امريکايانو دوه ټانکونه الوزولي دي .

ددغه ولايت د والي وياند ضيا ولي ځدراڼ وويل تېره ورځ ناوخته ددې ولايت په مقر ولسوالۍ کې دوه وسله وال طالبان وژل شوي دي .

هغه زياته کړه چې نښته هغه مهال رامنځته شوه، کله چې طالبانو د ملي اردو او ايساف پر ګډو ځواکونو بريد وکړ .

په غزني کې دايساف وياند ميډي زياتوي چې په نښته کې دوى او د ملي اردو ځواکونو ته هېڅ زيان نه دى اوښتى .

خو بل خوا وسله وال طالبان په ياده شوې نښته کې د نهو افغان او بهرنيو سرتېرو د وژل کېدو خبره کوي .

طالبان دا هم وايي چې د اندړو په سيمه کې يې دوه امريکايي ټانکونه هم الوزولي دي، خو بهرنيوځواکونو لاتراوسه په دې اړه څه نه دي ويلي .