طاهر خان له اسلام اباد څخه

	بريد د پاکستان پوځ د لوجستک مرکز ته څېرمه شوى او يوپوځي موټربشپړ له منځه تللى دى.

پوليس بريد کې د ٤ کسانو د وژل کيدو تاييد کړى ولې آزاد ټيلي ويژني چېنلونو د مړو شمير ٨ ښودلې دى.

پوليسو وويل چې په موټر سايکل سپور يو کس د پاکستاني پوځ د طب د څانګې بس سره نن سهار ( دوشنبې د فبروري ٤ ) هغه وخت وجنګاوۀ چې کار کوونکي مرکز ته روان وو.

د پوځي روغتون سرچينو وويل چې د چاودنې په نتيجه کې ٢٠ څخه زيات کسان ژوبل شول .

هيچا تر اوسه د چاودنې پړه په غاړه نه ده اخيستې ولې د کورنيو چارو وزير حامد نواز خان وويل کيداى شي چاودنه د پاکستاني طالبانو تحريک د مشر بيت الله ميسد لخوا شوې وي .

له چاودنې وروسته پوځ ټولې لارې وتړلې او خبريالانو ته يې هم د چاودنې ځايې ته د ورتلو اجازه ورنه کړه.

د چاونکي موادو ماهرينو وويل چې چاودنه کې اووه کيلو ګرامه مواد استعمال شوي دي .

تيرو څو مياشتو کې پېنډۍ کې ، چې د پوځ لوى مرکز لري ، د استخباراتي ادارې او د پوځ بسونه په نښه شوي دي .

پخوانۍ لومړۍ وزيره بې نظير بوټو پېنډۍ ښار کې د دسمبر په ٢٧ مه د ډزو او ځان وژونکي بريد په نتيجه کې وژل شوې وه.

پاکستان کې بمي چاودنې په داسې حال کې زياتې شوي چې هېواد کې پارلماني انتخابات د فبروري په ١٨ مه کيدونکي دي .

د پېنډۍ له تازه بريد وروسته ولسمشر پرويز مشرف د امنيتي ادارو د جگپوړو چارواکو يوه بېړنۍ غونډه راوبلله.