حنان حبيبزى له کابله

	دولتي چارواکي وايي چې د يو کميسون له لارې يې ددواړو غاړو ترمنځ د شخړې د اوارولو هڅه کړې ده او تمه لري چې ډير ژر به دغه لانجه اواره شي .

په کابل کې يوې ډلې د کوچيانو دسيال لوري ددفاع لپاره يوه غونډه رابللې اوادعايې وکړه چې په زرگونو هزاره توکمي د کوچيانو له خوا ليږدلو ته اړوتلي دي .

خو د کوچيانو استازي دغه ادعاوې ردوي .

دغه شخړه د څړځايونو پر سر راپورته شوه چې دواړه غاړې يې د څښتنولۍ ادعا کوي .

ددغو وسله والو نښتو د مرگ ژوبلې کره شمېرې نه دي څرگندې خو ويل کيږي چې لږ تر لږه درې تنه وژل شوي او يو شمېر نور بېدرکه دي .

دميدان وردک په ولايت کې دا شخړه ښيي چې دمځکې پر سر جگړه په دې هيواد کې د ناکراريو نوې څپه ده .

کوچيان تل ادعا کوي چې د هغو څړځايونو خاوندان دي چې دهيواد د پخوانيو واکمنو له خوا د افغانستان په بيلابيلو برخو کې ددوى په موسمي مېنو او دغرونو په لمنو کې په تلپاتې ډول ورکول شوي دي .

خو د سيمې خلک د کوچيانو ددغې ادعا منلو ته چمتو نه دي .

په کابل کې يوه ډله چې هزاره توکمو پورې يې اړه درلوده او ځان يې د خلکو د حريم د ساتنې کميټه بلله – ادعا وکړه چې دکوچيانو د يرغل په ترڅ کې ٢٠ زره کورنۍ له سيمې څخه بېځايه کيدو ته اړوتلي دي .

ددغې کميټې يو تن قربانعلي فصيحي د کابل د ولايتي شورا غړى دى.ده خبريالانو ته يو لړ شمېرې ورکړې :

(( په يوه وينا ٢٠ زره انسانانو خپلې اقتصادي سرچينې له لاسه ورکړي دي . ځاني زيانونه چې رسيدلي دي –تر اوسه له دوو څخه تر دريو پورې کسان وژل شوي دي او دولس نور ټپيان دي .
له اوو څخه تر اتو پورې کسان دوى يرغمل کړي دي .))

که څه هم کومې خپلواکې سرچينې ددغو شميرو پخلى نه دى کړى خو د کوچيانو له خوا هم د يو لړ ځاني زيانونو شميرې ورکړل شوي دي .

د کوچيانو يو مشر حاجي خان کاکوزى چې اوس په کابل کې دى ، د ښاغلي فصيحي ادعا بې بنسټه وبلله او پر سيال لوري يې تور ولگاو چې يوتن کوچى يې وژلى اوڅلور تنه کوچيان ددغې شخړې په لړ کې بې درکه شوي دي :

د کوچيانو او د هزاره توکمو ترمنځ نښتو پر افغان دولت هم نيوکې راپورته کړي دي .
دکوچيانو د سيالې غاړې ملاتړ کونکو وويل چې ټولو دولتي چارواکو ته يې خپلې ستونزې رسولي دي خو غوښتنو ته يې سم ځواب نه دى ورکول شوى .

خو دولتي چارواکي وايي چې د يو کميسون له لارې يې ددواړو غاړو ترمنځ د شخړې د اوارولو هڅه کړې ده او تمه لري چې ډير ژر به دغه لانجه اواره شي .