حنان حبىبزى له کابله

	له نن ديرش کاله وړاندې هغه مهال چې افغانستان دميوې او غلو دانو له لارې د خلکو اقتصاد پياوړى کاوو ،ميوې يې د سيمې د ځينې هيوادونو ته د خرڅلاو لپاره استول کيدې .

خو د افغانستان د صادراتو د پرمختيايې ادارې مشر سيد سليمان فاطمي د ميوې د صادراتو په وړاندې د يو شمير خنډونو يادونه وکړه .

نوموړي پوليس او د ښارواليو چارواکي پړ وبلل چې په لارو کې له سوداگرو د محصول په نامه ناقانونه ماليه اخلي .

سيد سليمان فاطمي د افغانستان له صادراتو څخه د محصول اخيستل يو مخ پر قانون د پښې اېښودل وبلل او پر دولت يې غږ وکړ چې له ښارواليو او څارندوى د قانوني چلند غوښتنه وکړي .

ښاغلي فاطمي په لويو لارو کې د پوليسو او د ښارواليو له خوا د پلټنو جوړ شوي مرکزونه د تازه او وچې مېوې د صادرولو په وړاندې د لوىو خنډونو په توگه ياد کړل .
نوموړي وويل :

((کله چې د افغانستان د وچې يا تازه ميوې يوه لارۍ او يا د نورو توکو هغه په لاره تيريږي ، په لارو کې پاټکونه جوړ شوي دي او له هغوى پيسې اخلي .

دا په بشپړ ډول ناقانونه کار دى .
هيڅ ډول گمرک او محصول پر صادراتو نشته .

له بده مرغه هغه مالومات چې پرون ماته راغلل ، د يوې پيټۍ نه څلور افغانۍ اخلي او د خټکو او هندوانو له لارۍ څخه لس زره افغانۍ اخيستل کيږي .))

ده دغه خبرې د افغانستان د سوداگرۍ دوزيرله دې اعلان سره جوختې کولې چې تازه او وچې ميوې د امريکا په څير د نړۍ نورو لويو هيوادونو ته د خرڅلاو لپاره ليږدوي .

وزير محمد امين فرهنگ ټولو هغو کسانو ته چې د وچې او تازه ميوې پېر او پلور کوي ډاډ ورکړ چې د افغانستان د صادراتو د پرمختيايي ادارې له لارې به يې توکي نړيوالو بازارونو ته ورسوي .

تير کال هم افغان دولت يو شمير گاونډيو هيوادونو ته د ميوې د صادرولو اعلان کړى وو خو ډير پراخ نه وو .
داسې ښکاري چې سږکال به دولت هغه تازه ميوې لکه خټکي چې هر کال له خرڅلاو څخه پاتې کېدې ، بهر ته د ليږدولو هڅه وکړي .

له نن ديرش کاله وړاندې هغه مهال چې افغانستان دميوې او غلو دانو له لارې د خلکو اقتصاد پياوړى کاوو ،ميوې يې د سيمې د ځينې هيوادونو ته د خرڅلاو لپاره استول کيدې .
خو وروسته بيا جگړو دا هر څه ويجاړ کړل .