د وردگو په ولايت کې بڼوالو شکايت لارۀ چې مڼو ته يې بازار نشته .

ولسمشر زياته کړه چې درې لسيزې وړاندې افغانستان په نړۍ کې د ميوو يو لوى صادرونکى هيواد وو .

دۀ له نړيوالو وغوښتل چې هغې کچې ته د افغانستان د بيا رسولو په لاره کې ورسره مرسته وکړي .

په غونډه کې د نړيوالې ټولنې په استازيتوب افغانستان ته د برتانيا سفير ډاډ ورکړ چې له افغانستان سره به مرستې ته دوام ورکوي .

د يادونې وړ ده چې په روان کال کې له کندهار څخه هند او د خليج يو شمير هيوادونو ته تازه ميوې وليږدول شوې خو د وردگو د ولايت بڼوالو شکايت لارۀ چې د دوى د ميوو لپاره افغان حکومت نړيوال بازار نه دى موندلى .

ښاغلي کرزي د افغانستان په هغو ولايتونو کې چې د کوکنارو د کرکيلې کچه پکې نه ده کمه شوې د لا ديرو هڅو غوښتنه هم وکړه .

دۀ د دغو ولايتونو له چارواکو وغوښتل چې له بزگرانو او سپين روبو سره خبرې وکړي او ويې هڅوي چې د نورې کرکيلې په باب فکر وکړي .

د مخدره توکيو پر ضد د مبارزې وزير حبيب الله قادري د هغو هڅو يادونه وکړه چې په دې برخه کې يې کړي دي .