الياس وحدت له سويل ختيځه

	نعمت الله د غزني له نسبتا ارامه ولسوالۍ، خواجه عمري، څخه تښتول شوى

نعمت الله، چې په پکتيکا کې د گوملې ولسوال و، څو ورځې مخکې له خپله کوره په غزني کې تښتول شوى.

د پکتيکا والي ډاکتر اکرم خپلواک ومنله چې نعمت الله د وسله والو لخوا د شپې مهال د غزني په خواجه عمري ولسوالۍ کې تښتول شوى.

د ولسوال د تښتولو خبر لومړى دوه ورځې مخکې طالبانو ورکړ. د وسله والو طالبانو وياند، ذبيح الله مجاهد بي بي سي ته ويلي و چې نعمت الله دوى تښتولى او اوس ورڅخه پلټنې کوي.

ويل کېږي چې ولسوال په رخصتۍ خپل کور ته تللى و، چې د غزني په نسبتا ارامه ولسوالۍ، خواجه عمري کې دى.

خپله د پکتيکا په مرکز، ښرنه ښار کې، تېره شپه ناڅرگنده وسله والو د ټاکنو د دفتر پخوانى ولايتي مشر وژل شوى. وسله وال طالبان وايي محمد برات، چې ويل کېږي اوس يې کومه رسمي دنده نه درلوده، دوى د شپې په خپل کور کې وژلى.

د افغانستان په سويل ختيځ کې په دې وروستيو کې نارامي په زياتېدا ده.

دوه شپې مخکې خوست ښار ته نژدې د گڼو هغو کسانو کورونو له مخې چاودنې شوې وې چې له حکومت يا نړيوالو ځواکونو سره کار کوي. وسله وال طالبان وايي دوى دا چاودنې دغو کارکوونکو ته د خبرداراي په توگه کړې چې خپلې دندې پرېږدي. په چاودنو کې چاته مرگ ژوبله نه وه اوښتې.