د ټلوالې د ځواکونو مرگ ژوبله وروسته له هغه کمه شوې چې تېر کال يې قومانده ناټو ځواکونو ته وسپارله

د ټلوالې له لورې په يوه خپره شوې خبرپاڼه کې ويل شوي چې د دوى يو سرتېرى په شينډنډ ولسوالۍ کې د جمعې په ورځ له دولت مخالفو وسله والو سره په يوه نښته کې ووژل شو.

له بريده وروسته د د متحدو ايالاتو په مشرۍ د ټلوالې ځواکونو شکمن ځايونه بمباري کړي. خبرپاڼې په دې اړه نور جزئيات نه دي ورکړي.

په هرات کې په دا وروستيو کې د حکومتي او بهرنيو ځواکونو په ضد بريدونه زيات شوي. تېره اونۍ همدلته د پوليسو يو قومندان له خپلو دريو ساتونکو سره په يوۀ کمين کې وژل شوى و.

بله خوا، په سويل ختيځ ولايت خوست کې د پوليسو يو سيمه ييز چارواکى له يو بل تن سره د وسله والو طالبانو په کمين کې وژل شوي.

د خوست د پوليسو وياند ډگروال وزير بادشاه بي بي سي ته وويل د تڼيو ولسوالۍ د کشف پر مشر، نور علي، نن (جمعه) سهار د خوست ښار په څو کېلومترۍ کې بريد وشو.

وياند زياته کړه چې ښاغلى نور علي له خپل ورو سره په يوه گاډي کې د سپرو وسله والو لخوا په نښه شوى. دۀ دا د طالبانو يو نوى تکتيک وباله چې په د گاډو په کارولو د حکومتي چارواکي پل اخلي او په يو گوښه ځاى کې پرې بريد کوي.

خوست ولايت په دې وروستيو کې د زياتېدونکي تاوتريخوالي شاهد دى. په وروستيو څو مياشتو کې دلته د خرپ او ترپ او ځانمرگي بريدونه شوي. تېره اونۍ په دوو پرلپسې چاودنو کې په خوست ښار کې شپږ ولسي کسان وژل شوي وو او تر ٥٠ ټپيان وو.