مالک عاصم له کابله

	د خوست اوسيدونکي وايي دوى به د خلکو يوه جرگه رابولي چې د ځان د ساتنې لپاره پر لارو چارو غورو وکړي .

دخوست ولسي مشران وايي ډېر ژر به د لويي پکتيا د قومونو مشران د تېرې ورځي د ځان مرگي بريد په څېر دنورو بريدونودمخنيوي لپاره سره راغونډ شي .

په خو ست ولايت کې قومي شورا او عادي وگړو د تيرې ورځي ځان مرگى بريد په اړه ډېر قهريدلي او وايي دوى به دخپلو ولسونو ددفاع لپاره له دولت سره مرسته وکړي .

دغه بريد دپکتيا دوالي د جنازې د خښولو په مراسمو کې وشو چې گڼ کسان يې ټپيان او ووژل .

ولسمشر کرزي او په افغانستان کې مېشتو اييتلافي ځواکونو دغه بريد د اسلام او انسانيت خلاف کار بللى دى .

دا لومړى ځل دى چې په افغانستان کې ديو ه کس د جنازې د ښخولو په دستورې کې ځان مرگى بريد کيږي .

دخوست اوسېدونکي بريد پر ولسي وگړو گڼي او وايي چې دې پېښې د ترهگرۍ څېره نوره هم خلکو ته په ډاگه کړه.

د خوست د قومونود پيوستون د شورامشر غازي نوازتڼي وويل په نژدې راتلونکي کې به د سيمي قومونه او مشران پر غه ډول يوې ستونزې دبحت لپاره راټول شي . ده په ډاگه کړه چې دغې پېښې له دولت سره د خلکو ملاتړ قوي کړ .

(( دټولو ولسونو ېوه غونډه به را وبلو او گډه اعلاميه به خپره کړو او پريکړه به وکړو چې دغه په لکونو ولسونه دې دخپلو خلکو ساتنه وکړي . نو موږ داپيښه په کلکه غندو او پر وړاندې ېې دريږو . ټول به له دولت سره د امنيت په ټينگولو کې مرسته کوو))

خو ست د افغانستان په ختيځ کې د ډېورنډ په پوله پروت هغه ولايت دي چې د قومونو پريکړې ته پکې ډېر درناوى کيږي او د سيمې د خلکو په وينا دهمدغو قومي پرېکړو له برکته يې امنيت تر ډېرو ولايتونو ډاډ من دي .

تردې وړاندې هم په دغه ولايت کې ځان مرگي بريدونه شوي دي . چې خلک يې د اسلام دمخالفينو چاره بولي . په سيمه کې ليکوال او ژورناليست نقيب الله متنوال وايي دې برېد دترهگرۍ د غندلو پر سر دخلکو خوله او نظر يو کړ.

(( هغه څوک چې پخوا د اورپکو خواخوږي وو اوس ترينه کرکه کوي او ټول خلک پرې بد وايي او دا کار دافغانيت ، اسلاميت اوپښتو خلاف کار بولي ))

دخوست او پکتيا څو نورو قومې مخورو وويل چې د پکتيا دپخواني والي تدفين په مراسمو کې چاودنه داښيي چې دافغان دولت مخالفين داسلام له نوم نه ناوړه گټه پورته کوي او دعامو وگړو وژلو ته يې ملاتړلې .

په خوست کې ډاکټران وايي دتېرې ورځې ځان مرگې بريد په ټپيانو کې دخوست د ولايتي شورا مشر، دملي پخلاينې دکميسيون مشر، دخوست دامنيت مشر، دگوربزو ولسوال اود څو پولېسو په گډون د ښونځېو زدکونکي اوسپين زېرې هم شامل دي .

په کابل کې د ولسمشر کرزي او د اېتلافي ځواکونو لخوا هم دغه پيښه غندل شوې او دا کار يې داسلام ، افغانيت او انسانيت خلاف عمل بللى .

تردې وړاندې د جهادې مشر مولوي يونس خالص او دکندهار دعالمانو دشورا دپخوانې مشر د جنازې او دوعا اخيستلو په مراسمو کې هم چاودنې شوې وې چې گڼ ملکي کسان او پولېس پکې ووژل شول . خو دالومړى ځل دى چې د مړي د تدفين په مراسمو کې ترهگر بريد کيږي.