محمود کوچى او کمال سعادت له کابل او خوست څخه

	حکيم تڼيوال نن ( دوشبنې د وږي ٢٠ د سپتمبر ١١ ) په خوست کې خاورو ته وسپارل شو .

د دغو د مراسمو پر وخت د افغانستان يو شمير وزيران او لوړ پوړي چارواکي هم خوست ته تللي وو .

يوۀ عيني شاهد بي بي سي پښتو وېبپاڼې ته وويل په دغه ځانمرگي بريد کې درې پوليس او يو ملکي کس وژل شوى دى .

خو د خوست والي ارسلا جمال بي بي سي سره په خبرو کې وويل چې په دغې پېښې کې ٦ پوليس وژل شوي او ١٦ نور کسان ټپيان شوي دي .

په ټپيانو کې د خوست ولايت د امنيت امر هم شامل دى . د افغانستان د کابينې هغه غړي چې د دغو مراسمو لپاره خوست ته تللي وو اوس بيرته کابل ته ستانۀ شوي دي او روغ رمټ پاتې دي .

تر دې وړاندې په کابل کې د جنازې د لمانځه پر وخت افغان ولسمشر حامد کرزي د پکتيا د والي حکيم تڼيوال مړينه د ټول افغان ولس لپاره د خپگان وړ وبلله .

هغه دغه خبره د ښاغلي تڼيوال د جنازې په مراسمو کې وکړه چې نن ( دوشنبې د وږي ٢٠ د سپتمبر ١١ ) په کابل کې تر سره شوه .

حکيم تڼيوال پرون غرمه د يو ځانمرگي بريد په ترڅ کې هغه مهال ووژل شو چې د خپل دفتر څخه د وتلو په حال کې وو

د پکتيا د والي حکيم تڼيوال جنازه د ځانگړو پوځي مراسمو په ترڅ کې ولمانځل شوه ، په همدې حال کې د وير نغمې هم غږيدې .

افغان ولسمشرحامد کرزى ، د کابينې گڼ غړي ، د ولسي او مشرانو جرگو ځيني غړي ، ليکوالو ، شاعرانو او د ښاغلي تڼيوال دوستان سره راټول وو ، وروسته يې د هغه جنازه په شوبلې بار کړه او د عيدگاه جومات په لور وخوځول شوه .

ولسمشر کرزي د جنازې په مراسمو کې وويل حکيم تڼيوال په وطن مين سړى وو چې هم د عمل خاوند وو او هم يې اکاډوميکې لاسته راوړنې درلودې .

د ولسمشر په وينا تڼيوال يې شخصي ملگرى وو او دى په دغه پيښه سخت خواشينى دى او دغه عمل په کلکه غندي .

د جنازې د لمانځه تر ادا کولو وروسته د ښاغلي تڼيوال مړى د هغه پلرني ټاټوبي د خوست ولايت ته يوړل شو.

حکيم تڼيوال په افغانستان کې لومړنى والي دى چې د طالبانو تر نسکوريدو وروسته د يو ځانمرگي بريد په ترڅ کې وژل کيږي .

په هغه پېښه کې د والي دوه ساتونکي ځاى پر ځاى ووژل شول او شپږ کسه نور ټپيان شو .

په ټپيان کې يوۀ تن نن ساه ورکړه . طالبانو د دغه بريد پړه په غاړه اخيستې ده .