د قبالې راکړه ورکړه يوه له هغو مسايلو څخه ده چې د شير پورد ځينو کورونو د خرڅولو په وړاندې يې خنډونه پيدا کړي دي.د کابل ښاروالي د ملکيتونو مشر وايي چې تر اوسه يې د شير پور ٢٤ کورونو ته قبالي ورکړي دي او له هرې نمرې مځکې څخه يې ١١٢٥٠ امريکايي ډالره اخيستي دي.

د پيروز بام افغان ساختماني شرکت انجينير رحيم الله وايي چې په شير پور کې هره ودانۍ د موادو په لحاظ ځانگړې بيې لري. او په ودانيو کې کارول شوي مواد له بهر څخه راوړل شوي دي.

د دغو کورونو د پير او پلور بيه پخپله يوه لويه معما ده . د معاملو د لارښونې دلالان ظاهرا داسې ښېي چې گواکې دغه کورونه له ٢٠٠ زره نيولې تر ٦٠٠ زره امريکايي ډالرو پورې بيه لري . خو داسې اټکلونه دي چې دغه کورونه د لکونو په ځاى په مليونونو ډالرو خرڅيږي .

دا هم ډاگيزه ده چې ځيني کسان په دغه سيمه کې د يوې په ځاى دوه يا درې نمرې مځکه لري . دا ډول يې ځينې د کابل په نورو سيمو کې هم کورونه لري.خو ان د ښاروالۍ چارواکي لا زړه نه کوي چې د هغوى نومونه رسوا کړي.

دا سيمه د ودانيو د جوړښت له اړخه له نور کابل سره توپير لري. دلته په هر لوري دوه پوړيزې ، درې پوړيزې او ان څلور پوړيزي ودانۍ تر سترگو کيږي

په کابل کې د معاملو د لارښونې د دفتر يو مشر چې د نوم له اخيستلو ډډه کوي ، د شير پور دغه ودانۍ خورا عصري او فيشني بولي او وايي چې د دغو کورونو هر پوړ د يوې حويلې په شان پراخ دى. د هغو شرکتونو او موسسو چارواکي چې د شير پور کورونه يې په کرايه نيولي د کرايې د اندازې په اړه معلومات نه ورکوي .