د تاوتريخوالي له امله د هنگو ښار نژدې ټول په اور کې لولپه شوى دى

د هنگو له ښارگوټي سره نژدې د ابراهيمزي کلي په غرونو کې دواړه خواوې يو پر بل د توپکو او توغنديو بريدونه کوي.

په سيمه کې د حکومت له خوا گرځبنديز لگېدلى دى.

دا تاتريخوالى وروسته له هغې ډېر شو چې د زيارت يا پنجشنبې په ورځ د عاشورې د مراسمو د لمانځلو پر مهال يوۀ ځانمرگي خپل ځان د خلکو په مينځ کې وچووۀ .

په هنگو کې پارېدلو خلکو هټيو ته اور واچوۀ ،د جمعې په ورځ هم له ډېرو هټيو څخه د اورلمبې پورته کېدې.

داسې ويل کېږي چې د ښار په سلو کې ٧٠ دوکانونه سوځول شوي دي.

که څه هم دا مهال ښارگوټى د ملېشو او پوليس په ولکه کې دى خو ځايي خلک وايي چې حکومت د عاشورې د مراسمو پر وخت ټينگ امنيت نه وو نيولى.

د پاکستان د کورنيو چارو وزير آفتاب احمد شېرپاو پرون وويل پوځيان هنگو ته استول شوي چې نظم بېرته ټينگ کړي.

د سميه ييزو پوليسو مشر ايوب خان له هغه وروسته پرون گرځبنديز ولگاوه چې قهرېدلو شيعيه گانو دوکانونو او موټرو ته اور واچاوه او له پوليسو سره يې نښتې وکړې.

پاکستان د ډېرو کلو لپاره د سنيانو اوشيعيه گانو ترمنځ د فرقه يي نښتو شاهد وو.

د پاکستان نور خبرونه د دې ځاى په کېکاږلو ترلاسه کولى شئ