امين ارسلا وايي افغانستان هغه شرايط واردمخه پوره کړي چې د سوداگرۍ نړيواله ټولنه يې غواړي .

ښاغلي ارسلا چې د نړيوالې سوداگرۍ د ټولنې له کالنۍ غونډې کابل ته ستون شوى هيله وښووله چې د دغه غړيتوب په مټ به په افغانستان کې نړيوالو پانگونو ته لاره پرانيستل شي .

د سوداگرۍ د نړيوالې ټولنې يو مهم شرط د هيوادونو د سوداگرۍ د قوانينو اصلاحات دي . د چين او سعودي عربستان په څير هيوادونو د دغې ټولنې غړيتوب ته لس کاله هلې ځلې وکړې .

د سوداگرۍ وزير هدايت امېن ارسلا وويل سږ کال په لومړي ځل افغانستان د سوداگرۍ دنړيوال ټولنې په غونډه کې گډون درلود چې په دې وروستيو کې په هانگ کانگ کې وشوه .

ښاغلى ارسلا وايي دوى چټکې هڅې کوي چې دنړېوالې سوداگرۍ د ټولنې غړېتوب ژرترژره ترلاسه کړي . دۀ وويل په همدې موخه د افغانستان د سوداگرۍ په قانون کې هم ځيني اصلاحات کيدونکي دي .

ښاغلي ارسلا وويل (( د افغانستان سوداگريز شرايط واردمخه د سوداگرۍ د نړيوالې ټولنې له غوښتنو سره سم دي . نړيوالې مرستې او همکارۍ هم د غړيتوب په ترلاسه کولو کې مهمه ونډه لرلى شي . ))

د سوداگرۍ وزير وويل نورو هېوادونو تر خورا ډيرو هلو ځلو وروسته دغه غړېتوب ترلا سه کړى خو له افغانستان سره د متحدو ايالاتو ملاتړ شته او کېداي شي چې د دوى وړاندېز ژر ومنل شې.

افغانستان به د دې ټولنې د غړيتوب له ترلاسه کولو وروسته وکولاې شي دسوداگرۍ او پانگې اچونې په ډگر کې د نړيوالو پام ورخپل کړي .

د سوداگرۍ نړېوال سازمان نژدې ١٥٠غړي لري او څه باندې ٢٠ نورهيوادونه دا مهال د دې ټولنې د غړېتوب لپاره هڅې کوي .

د اقتصاد نور خبرونه د دې ځاى په کېکاږلو ترلاسه کړئ