تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د هندي فلمونو ستوري سوشانت سېنګ راجپوت "ځان وژنه کړې"
د هندي فلمونو یو تر ټولو نامتو ستوری، سوشانت سېنګ راجپوت، په ممبی ښار کې په خپل اپارتمان کې مړ موندل شوی دی. د ممبی ښار پولیسو وایي، داسې ښکاري چې ۳۴ کلن سوشانت ځان وژنه کړې ده.
سوشانت په تلویزیوني خپرونو او فلمونو کې نوم کړی و، خو د شهرت لوی لامل یې د (اېم اېس دهوني: ناویلې کیسه) په نامه هغه فلم و چې ده پکې د هند د کرېکټ اتل مهېندر سېنګ دهوني رول لوبولی و.
د هند لومړي وزیر نرېندرا مودي سوشانت ته خپل درناوی وړاندې کړی او هغه یې یو داسې تکړه ځوان ممثل بللی چې دېر ژر له دې نړۍ ولاړ.
سوشانت د هند په ختیځ بیهار ایالت کې زېږېدلی و او د فلمونو او نڅا د شوق لپاره یې د انجینرۍ پوهنځي نیمایي کې پرېښود.
په بالیووډ سینما کې د نوموړي لومړی رول په ۲۰۱۳ کال کې د (کای پوچې) په نامه فلم کې و، چې د برلېن فلمونو په فیستیوال کې هم وستایل شو.
د سوشانت وروستی فلم د (چیچورې) په نامه و چې تېر کال نندراې ته وړاندې شو. د دې فلم ډایرکټر نیتېش تیواري ویلي، همدا تېره اوونۍ یې سوشانت سره خبرې کړې وې.
سوشانت د جون میاشتې پر ۳مه نېټه پر انسټګرام، چېرې چې ده تر لس میلیونو ډېر مینه وال درلود، په خپل وروستي پوسټ کې د خپلې مور یو عکس خپور کړی و.
سوشانت له دې عکس سره لیکلي وو: "له اوښکو د ماضي تت انځور راپورته کېږي". د نوموړي مور په ۲۰۰۲ کال کې هغه مهال مړه شوې وه چې دی لا زلمی و.
د سوشانت پخوانۍ منجره، ۲۸ کلنه دیشان سالیان هم تېره اوونۍ په ممبی کې د یوې ودانۍ له څوارلس پوړه لاندې ولوېده او مړه شوه.
د دیشان له مړینې وروسته سوشانت راجپوت لیکلي وو: "سخت ځوروونکی خبر دی. زما خواخوږي د دیشان له کورنۍ او ملګرو سره ده. ستا روح دې په ارام وي".
د نړۍ په لر او بر کې د بالیووډ سیمنا مینه وال به په داسې حال کې د سوشانت راجپوت په مړینه ویر کوي چې همدا تېره اپرېل میاشت کې د ریشي کپور او عرفان خان په څېر دوه لوی هنرمندان هم مړه شول.
