د غزني ګیرو ولسوالۍ کې د "پخواني ماین" چاودنې ۹ ماشومان وژلي
د عکس سرچینه، S M
په غزني کې د طالبانو حکومت سیمهییز چارواکي وايي، د دغه ولایت په ګیرو ولسوالۍ کې د یوه پخواني ماین چاودنې لږترلږه ۹ ماشومان وژلي دي.
پژواک خبرياژانس د غزني د اطلاعاتو او فرهنګ ریاست چارواکو په حواله لیکلي چې دا پېښه تېره ورځ ناوخته د ګیرو ولسوالۍ په ځدراڼو کلي کې شوې.
د غزني د اطلاعاتو امر مولوي منصور افغان ویلي، چې د روسانو له وخته راپاتې ماین د لوبو پر مهال پر ماشومانو چاودلی دی.
د نوموړي په وینا په وژل شویو کې پنځه نجونې او څلور هلکان دي او عمرونه یې هم د څلورو او لسو کلونو ترمنځ ښودل شوي دي.
دا مرګونې پېښه داسې مهال شوې چې روانه اوونۍ (د اپریل ۴مه) د 'ماین د خطر په اړه د عامه پوهاي نړیواله ورځ' نمانځل کېږي.
د ماین پاکۍ موسسو د مالوماتو له مخې په افغانستان کې لسګونه ډوله ماینونه او ناچاودنه مهمات موجود دي.
یوناما یا په فغانستان کې د ملګرو ملتونو مرستندویه ماموریت همدا نن (دوشنبه) پر خپله فېسبوک پاڼه یوه پیغام کې لیکلي، چې د تېرو څو لسیزو په اوږدو کې ماینونو او له جګړو پاتې شویو ناچاوده توکو زرګونو ملکي افغانانو ته مرګ ژوبله اړولې، چې ډیرې یې ماشومان دي.
د عکس سرچینه، Getty Images
که څه هم افغانستان کې د ماینونو د قربانیانو کره شمېر مالوم نه دی، خو ملګرو ملتونو تېر کال په یوه رپوټ کې وویل چې له ۱۹۸۹ زېږدیز راهیسې نږدې ۵۷ زره ملکي افغانان د ماینونو او ناچاودو توکو ه چاودنو کې یا وژل شوي او یا هم ټپي شوي دي.
له جګړې پاتې شوي چاودیدونکي توکي او په لارو او کروندو کې ځای پر ځای شوي ماینونه، تر ډېره د هغو بې ځایه شویو ملکیانو ژوند ګواښي، چې تر جګړې وروسته خپلو مېنو ته ګرځي.
دا خطر هغه مهال نور هم زیاتېږي چې پر دغو ماینونو د ملکي د سپرلۍ موټر وربرابر شي او یا ماشومان ناچاودي مهمات ومومي او لوبې پرې کوي.
د عکس سرچینه، Getty Images
په افغانستان کې له ۱۹۸۹ زېږدیز کال راهیسې د ماین پاکۍ عملیات روان دي.
یوناما وايي، د ماین پاکۍ برخه کې بشردوستانه همکارانو په دې موده کې شاواخوا ۳ زره مربع کیلومتره ځمکه له ماینونو او د نورو ناچاوده توکو پاکه کړې ده.
د ماينونو لټولو، موندلو او شنډولو پروسه هم اوږده او له خطر تشه نه ده.
د ملګرو ملتونو عمومي اسمبلۍ د ۲۰۰۵ کال ډسمبر کې د اپریل څلورمه د ماین د خطر په اړه د عامه پوهاوي ورځ ونوموله او دا ورځ ۲۰۰۶ کال راهیسې رسمآ نمانځل کېږي.
د دغه سازمان مالومات ښيي چې اوس هم ماینونه او ناچاوده مهمات هر کال د نړۍ ۸۴ هېوادونو کې د ۱۵ او ۲۰ زرو ترمنځ خلکو ته مرګژوبله اړولي.
