تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
غزه کې درنو بمباریو لسګونه فلسطینیان وژلي؛ اسرائیل وایي رفح کې یې دوه تنه یرغمل ژغورلي
اسرائیل وايي، د غزې پر سوېلي ښار د اسرائیلي الوتکو د درنو بمباريو سره هم مهاله د رفح په ښار کې یې دوه تنه يرغمل شوي نارينه را خوشې کړي دي.
د اسرائیلو پوځ ویلي د خوشې شویو کسانو روغتیايي حالت ښه دی.
تر دې مخکې د فلسطین سرې میاشتې ټولنې ویلي و، په رفح ښار هوايي بریدونه شوي او ګڼو کسانو ته په کې مرګ ژوبله اوښتې ده.
پر دغه ښار د اسرائیلو د پلان شوي برید په اړه د نړیوالې ټولنې خبر داري ورکړي وو، چې شاوخوا یو نیم میلیون کسانو په کې پناه اخیستې.
اسرائیلو ویلي، د غزې په سوېلي سیمو یې بریدونه کړي، خو نور جزییات یې نه دي ورکړي.
په ټولنیزو رسنیو کې وروسته په یوه اعلامیه کې ویل شوي، د اسرائیلو دفاعي ځواکونو د اسرائیلو له امنیتي ادارې یا شین بیټ او د اسرائیلي پولیسو د ګډو عملیاتو په ترڅ کې، دوه اسرائیلي برمته شوي وژغورل شول. د دوی نومونه شپېته کلن فرناندو سیمون مارمن او اویا کلن لوئس هار یاد شوي دي.
ژغورل شوي یرغمل شوي کسان د معایناتو لپاره د اسرائیلو د شیبا طبي مرکز ته وړل شوي.
د اسرائیلو دفاعي ځواکونو په یوه نامعلوم ځای کې د شپې پر مهال د یوې چورلکې د ښکته کېدو عکسونه خپاره کړي دي، خو دا څرګنده نه ده چې دغه کسان په کې سپاره وو که نه.
ژغورل شوي څوک دي؟
د اسرائیلو دفاع وزیر یوف ګالنټ د ژغورنې عملیات "اغېزمن" بللي او زیاتوي: "موږ به په هر ډول چې وي، د برمته شویو د بېرته راستنېدو لپاره، خپلې ژمنې ته ټینګ پاتې شو."
اسرائیلي رسنیو ویلي، یرغمل شوي کسان د رفح ښار د یوې ودانۍ په دوهم پوړ کې ساتل شوي وو.
وروسته د شیبا د طبي مرکز سرپرست مشر ارمون ایک وویل: "ډېر خوښ یم چې وایم نن شپه دوه خوشې شوي یرغمل شوي دلته راوستل شوي او حالت یې ښه دی."
د اسرائیلو پوځ د غزې په تړانګه کې خپل عملیات وروسته تر هغه پیل کړل چې د اکتوبر په اوومه د حماس وسله والو لخوا د اسرائیلو په سوېل کې تر ۱۲۰۰ ډېر کسان ووژل شول او شاوخوا ۲۴۰ تنه یې یرغمل کړل. یو شمېر یرغمل شوي کسان وروسته خوشې شول.
د دوشنبې په ورځ په رفح کې د اسرائیلو د ژغورنې عملیات وروسته تر هغه پیل شول چې په ښار کې عیني شاهدانو د ښار په شمال او مرکز کې د شپې په اوږدو کې د اسرائیلو د لسګونو هوایی بریدونو خبر ورکړ.
ځايي اوسېدونکو بي بي سي ته ویلي، په برید کې چورلکو او کیښتیو هم ونډه لرله.
د مرګژوبلې په اړه بېلابېل راپورونه ورکول شوي دي. د اې اېف پي خبري اژانس په غزې کې د حماس تر ولکې لاندې د روغتیا وزارت له قوله ویلي، د ماشومانو په ګډون ۵۲ تنه فلسطینیان وژل شوي. په ورته وخت کې، رویټرز خبري اژانس د غزې د روغتیایی چارواکو له قوله د مړو شمېر ۳۷ ښوولی دی.
د یکشنبې په ورځ، په غزه کې د حماس د روغتیا وزارت ویلي و، د تېرې ورځې په اوږدو کې د اسرائیلو پوځ لخوا ۱۱۲ تنه نور فلسطینیان وژل شوي، چې په ټولیزه توګه د مړو شمېره ۲۸۱۰۰ او د ټپيانو شمېر ۶۷۵۰۰ ته رسېدلی دی.
یو شمېر هېوادونو او نړیوالو سازمانونو اسرائیلو ته پر رفح ښار د خپل پلان شوي برید په اړه خبرداری ورکړی، چېرې چې د غزې له نورو سیمو ډېری خلک هلته ورتښتېدلي دي.
د ملګرو ملتونو د بشري مرستو یوه جګپوړي چارواکي بي بي سي ته ویلي. اوس د دوی د اوسېدو لپاره هېڅ خوندي ځای نشته.
رفح له مصر سره پر پوله غزې ته د بشري مرستو د ننوتلو یوازینۍ لاره ده.
