محمد يونس برهان کابل

	له هغه مهال راهيسې چې طالبان شپږ کاله مخکې راپرځول شول دا لومړى ځل دى چې طالبان خبرو اترو ته چمتووالى ښيي

طالبانو وروسته له هغه دغه هوکړه وکړه چې افغان ولسمشر حامد کرزي تېره ورځ يو ځل بيا دوى ته د خبرو اترو وړانديز وکړ.

په وروستيو کې د نړيوالې ټولنې ځينو استازو هم په افغانستان کې د روانو ناامنيو د پاى ته رسولو په موخه له طالبانو سره د کېنستلو وړانديزونه کړي وو.

له هغۀ راهيسې چې شپږ کاله مخکې طالبان له کابل څخه وايستل شول، دا لومړى ځل دى چې دوى له افغان حکومت سره د خبرو لپاره چمتووالى ښيي.

د حکومت يوۀ وياند د طالبانو چمتووالي اعلان ته له احتياطه ډک، خو مثبت غبرگون ښوولى دى.

په وروستيو دريو کلونو کې د پخوانيو طالبانو پاتې شوني د حکومت د تر ټولو سرسختو وسله والو مخالفينو په توگه راڅرگند شول.

په وروستيو کې د حکومتي او بهرنيو ځواکونو پر نښو د دوى بريدونه په پراخه توگه زيات شوي دي.

'مخامخ' بلنه  موږ هېڅکله هم د خبرو اترو لاره نه ده رد کړې، خو ستونزه تل د حکومت لخوا وي چې خپل واک نه لري. که دوى مخامخ له موږه وغواړي چې ورسره خبرې وکړو، موږ تل د اسلامي اصولو په چوکاټ کې خپلو شرايطو ته په پام چمتو يو. قاري يوسف احمدي

د طالبانو يوۀ وياند قاري يوسف احمدي بي بي سي ته وويل که کابل ورڅخه مخامخ غوښتنه وکړي دوى حاضر دي چې له حکومت سره خبرو ته کېني.

دۀ وويل: ''موږ هېڅکله هم د خبرو اترو لاره نه ده رد کړې، خو ستونزه تل د حکومت لخوا وي چې خپل واک نه لري. که دوى مخامخ له موږه وغواړي چې ورسره خبرې وکړو، موږ تل د اسلامي اصولو په چوکاټ کې خپلو شرايطو ته په پام چمتو يو.''

دم گړۍ د طالبانو لخوا د خبرو اترو يوازېنى شرط دا ښوولى چې حکومت دې د دوى د مرکچيانو امنيت ونيسي.

د ولسمشر حامد کرزي وياند، همايون حميدزاده، وويل چې دوى لومړى د هغۀ کس په اړه پلټنه کوي چې وايي د طالبانو وياند دى، او که هغه سړى رښتيا هم د طالبانو په استازيتوب خبرې کوي بيا حکومت پر خپل ځواب غور کوي.

افغان ولسمشر حامد کرزي په وار وار طالبانو ته بلنه ورکړې چې ورسره د خبرو په مېز کېني، خو طالبانو به پخوا تل لومړنى شرط د بهرنيو ځواکونو وتل ښوول او خبرې اترې يې له سره ناشونې بللې.

خبرو اترو ته د د دوى د لومړني تياري ښوول هم د ولسمشر کرزي د يکشنبې د ورځې د بلنې غبرگون و.

خو تر اوسه دا لا جوته نه ده چې له دغۀ اعلانه مخکې د حکومت او طالب استازو تر منځ لومړنۍ خبرې اترې شوي که نه.

	طالبان په وروستيو دريو کلونو کې د بريدونو په زياتولو د تر ټولو زورورو وسله والو مخالفينو په توگه راڅرگند شول

له دې مخکې هم د متحدو ايالاتو په گډون د ځينو لوېديځو هېوادونو استازو په ډاگه کړې وه چې د افغانستان د روانې ناکرارۍ حل له پوځي لاره نه شي کېداى.

دوى دا هم ويلي چې افغان طالبان د سولې په پروسې او د ولسواکۍ له لارې په اوسني سياسي بهير کې هم ورگډېداى شي.

له کله چې شپږ کاله مخکې د طالبانو حکومت راوپرځول شو، د هغوى يو شمېر جنگياليو وسله وال مقاومت ته مخه کړه.

په وروستيو څو کلونو کې دغه جگړه خورا پراخه شوه او د افغان حکومت لپاره تر ټولو لويه ننگونه د امنيت ساتنې جوړ کړ.