ولسمشر کرزى به له ولسمشر بوش سره د افغانستان د روانو پرمختياوو په اړه خبرې وکړي

د يوۀ جگپوړي پلاوي په سر کې د ولسمشر کرزي دغه سفر د راروانې امن جرگې په درشل کې کېږي. له امريکايي ولسمشر سره به د کرزي د خبرو يوه موضوع هم له پاکستان سره د اړيکو او په سيمه کې دامنيت خبره وي.

د ارگ وياند همايون حميدزاده وايي ولسمشر کرزى به په دغه دوه ورځني سفر کې له ولسمشر بوش سره همدارنگه د بهرنيو ځواکونو په عملياتو کې د ولسي خلکو پر مرگ ژوبلې هم خبرې وکړي.

دوه مشران د کمپ ډيويډ په ارامځاى کې په داسې حال کې سره گوري چې د دوى د وروستۍ کتنې تر ټولو ستره پايله - له پاکستان سره د امن گډه جرگه - د لاسته راتلو په حال کې ده.

په ترهگرۍ ضد جگړه کې د دوو لوريو همکاري، د نشه يي توکو په وړاندې هلې ځلې او له گاونډيو هېوادونو سره اړيکې به د افغان او امريکايي مشرانو د خبرو له نورو موضوعاتو څخه وي.

دواړه مشران به د افغانستان د پرمختياوو په اړه په داسې مهال کې سره وگوري چې په هېواد کې روان حالات په بېلابېلو برخو کې ترينگلي ښکاري.

امنيت لا هم نه دى ټينگ شوى، د کوکنارو کر تر بل هر وخت زيات شوى او په حکومتي ادارو کې د فساد په اړه شکايتونه تر پخوا لا ډېر پراخ شوي.