مصطفى سالک له کابله

	افغانستان له ١٢٠ څخه ډيرې تاريخې سيمې لري چې د سيلانيانو لپاره زړه راښکونکي دي.

په دې پروژه به څه دپاسه ٧ ميليونه ډالره لگښت راځي چې د راروانو دريو کلونو په ترڅ کې به يې کار پاى ته ورسيږي .

افغانستان گڼې لرغونې نښې او د ليدو وړتاريخي سيمې لري-له همدې کبله چارواکي وايي که سيلانيان رامات شول نو دغه هيواد به هر کال د ميلونو ډالرو گټه تر لاسه کړي.

افغانستان له ١٢٠ څخه ډيرې تاريخې سيمې لري چې د سيلانيانو لپاره زړه راښکونکي دي.
خو داچې په دغه هيواد کې امنيت کړکيچن دى ،نړيوال سيلانيان يې ليدو ته زړه نه ښه کوي.

د افغانستان د اطلاعات او کولتور وزارت مرستيال غلام نبي فراهي وايي چې افغانستان د نړيوالو سيلانيانو لپاره گڼ لرغوني اثار او د سيل سيمې لري.

اطلاعات او کلتور وزارت غواړي چې د افغانستان ټولو سيمو ته د سيلانيانو پام راواړوي،خو ډير ارزښت باميانو ته ورکړل شوى دى.

دغه ولايت د بودا دوه سترې او لرغونې مجسمې لرلې چې طالبانو د خپلې واکمنۍ په وروستيو مياشتو کې ړنگې کړې.

اوس افغانستان د يونسکو او جاپان هيواد په مرسته غواړي چې د نړيدلو مجسمو پر ځاى نوې مجسمې جوړې کړي.

دغه ولايت د بند امير په نامۀ يوه ابنا هم لري چې د اوړي په موسم کې ورته له لريو هيوادونو څخه د راز راز مرغانو سيلونه راځي او د سيمې ښکلا لا پسې ډيروي.

خو سره له دې بيا هم افغانستان ته د تير مهال په څير سيلانيان نه راځي ښايي يو لامل يې دا وي چې د جگړو په کلونو کې لرغونو نښو نښانو ته نه رغېدونکي زيانونه اوښتي او بله داچې نړيوال د افغانستان د امنيتي حالت په اړه هم انديښمن دي .

افغان چارواکي وايي که سيلانيانو ته اړينې اسانتياوې برابرې شي نو دغه هيواد به هر کال په ميلونونو ډالر لاس ته راوړي.

د سيلانيانو د را ماتولو پروژه څه دپاسه ٧ ميلونو ډالرو ته اړتيا لري چې لايې چا د مالي ملاتړ ټټر نه دى وهلى.