امریکا: القاعده ښايي د الظواهري د غچ اخیستو هڅه وکړي
د عکس سرچینه، AFP
د امریکا حکومت د دوی بې پیلوټه الوتکو لخوا کابل کې د القاعده شبکې د مشر ایمن الظواهري تر وژل کېدو وروسته خپلو اتباعو ته ټينګه سپارښتنه کړې چې بهر د سفر پر مهال د امریکا ضد تاوتریخوالي د احتمال په تړاو هوښیار اوسي.
د امریکا بهرنیو چارو وزارت ویلي د القاعده ملاتړي یا نورې اړوندې ترهګرې ډلې ښايي هڅه وکړي د الظواهري د وژنې غچ کې د امریکا ګټې او وګړي هدف وګرځوي.
ایمن الظواهري د یکشنبې سهار وختي کابل کې د امریکا د بې پیلوټه الوتکې برید کې ووژل شو.
هغه پر امریکا د ۲۰۰۱ کال د سپتمبر د نهمې بریدونو سازمانولو کې ښکېل و چې نږدې ۳ زره کسان پکې وژل شوي وو.
۷۱ کلن الظواهري چې په خټه مصری او د سترګو جراح و، د امریکا د ځانګړو ځواکونو لخوا په ۲۰۱۱ کال د پاکستان ایبټ اباد کې د القاعده شبکې د بنسټګر او مخکیني مشر اسامه بن لادن له وژل کېدو وروسته، د دې ډلې مشرۍ ته ورسېد.
د هغه وژنه د سې شنبې پر ورځ د امریکا ولسمشر جو بایډن تایید کړه.
ښاغلي بایډن وویل د الظواهري په وژل کېدو سره د سپتمبر د ۱۱مې بریدونو د قربانیانو کورنیو ته یو څه انصاف ترلاسه شو.
د امریکا ولسمشر د القاعده شبکې دغه مشر همدا راز د دوه زرم کال اکتوبر کې د یمن عدن بندر ته څېرمه د امریکا پر "یو اېس اېس کول ناوال" جنګي بېړۍ او تر هغې دوه کاله وروړاندې، ۱۹۹۸ کال کینیا او تانزانیا کې د امریکا پر سفارتونو بریدونو کې هم ښکېل وباله.
پر "یو اېس اېس کول ناوال" جنګي بېړۍ برید د امریکا ۱۷ سمندري ځواکونه او پر سفارتونو بریدونو کې ۲۲۳ کسان وژل شوي وو.
د امریکا بهرنیو چارو وزارت اوس یوه اعلامیه کې ویلي د دوی پر باور د الظواهري تر وژل کېدو وروسته د امریکا ضد تاوتریخوالي احتمال خورا ډېر شوی دی.
د عکس سرچینه، Getty Images
دا اعلامیه وايي "اوسني مالومات ښيي چې ترهګرې ډلې د نړۍ لروبر بېلابېلو سیمو کې پر امریکايي ګټو د ترهګریزو بریدونو پلانولو ته دوام ورکوي."
د امریکا د بهرنیو چارو وزارت دې اعلامیه کې زیاته شوې چې "دغو بریدونو کې ښايي د ځانمرګو عملیاتو، ترورونو، تښتونو، برمته نیونو او بم اېښودونو په ګډون بېلابېل تکتیکونه شامل وي."
په دغه خبرداري کې ویل شوي امریکايي وګړو ته کلکه سپارښتنه کېږي چې بهر د سفر پر مهال اګاه او په لوړه کچه محتاط اوسي.
