جي-۲۰ سرمشریزې ته د طالبانو پیغام: د امریکا په ګډون ټولو هېوادونو سره ښې اړیکې غواړو

طالبان وايي په ایټالیا کې د جي شل یا شلو سترو صنعتي هېوادونو سرمشریزې ته یې پيغام دا دی چې افغانستان غواړي د امریکا په ګډون له ټولو هېوادونو سره ښې اړیکې ولري.

د طالبانو د حکومت ویاند او د اطلاعاتو او فرهنګ وزارت مرستیال ذبیح الله مجاهد یوه خبري غونډه کې وویل، چې پر ځینو هېوادونو د امریکا او نړۍ له خوا فشارونه دي او نه یې پرېږدي چې د دوی رژیم په رسمیت وپېژني.

شاوخوا دوه نیمي میاشتې کېږي چې طالبان واک ته رسېدلی خو د دوی رژیم لا د کوم هېواد له خوا په رسمیت نه دی پېژندل شوی. آن د پاکستان په څېر هېوادونو هم د دوی رژیم په رسمیت نه دی پېژندلی چې له وړاندې یې ورسره ښه اړیکي پاللې او اوس د نړۍ له نورو هېوادونو غواړي چې د طالبانو حکومت په رسمیت وپېژني او له افغانستان سره مرستې وکړي.

د طالبانو ویاند ذبیح الله مجاهد په ایټالیا کې د شلو سترو صنعتي هېوادونو یا جي شل پر سرمشریزه غږ وکړ چې د طالبانو رژیم ته د مرستې لاس ورکړي او په رسمیت یې وپېژني.

ذبيح الله مجاهد وويل "موږ غواړو د جګړې څپرکی پای ته ورسوو او له نورو هېوادونو په تېره له لویدیځو هېوادونو سره د اړیکو نوی پړاو پیل شي. دا هلته د [شلو سترو صنعتي هېوادونو] غونډه کې ټولو ګډونوالو ته یو ښه پيغام دی او اوسنی حکومت دې په رسمیت وپېژني".

ښاغلی مجاهد وايي، "پر ځینو هېوادونو نړیوال یا د امریکا فشار شته او موږ یې درک کوي. خو دوی اړ کېږي افغانستان په رسمیت وپېژني ځکه دا دوه اړخیزه اړتیا ده. که دوی له موږ د امنیت تامین او هېوادونه یې له دې ځایه ونه ګواښل شي نو موږ باید د یوه مسؤول لوري په توګه په رسمیت وپېژني. بیا به موږ خپل مسوولیتونه تر سره کړو خو اوس موږ دې ته نژدې شوي يو".

ذبيح الله مجاهد څو ورځې وړاندې له امریکايی چارواکو سره د طالب استازو لیدنې مثبتې وبللې او هیله یې وښودله چې طالبان به د دوی له رژیم سره اړیکو پاللو په اړه له سره غور وکړي. د طالبانو وياند وویل که امریکا د طالبانو رژیم په رسمیت نه پیژني نودا هم د سیمې او هم د نړۍ ستونزه کېدای شي.

د جي شل سرمشریزې اصلي موضوع ګانې که څه هم نړیوال اقلمیي بدلون او کورونا ویروس دی خو د افغانستان یادونه هم په کې وشوه. دې غونډې ته د ملګرو ملتونو سرمنشي انتونیو ګوتیرش وویل، چې د افغانستان په اړه اندېښمن دی ځکه د ده په وینا د دې هېواد اقتصاد د نړېدو په حال کې دی او د ژمي په رارسېدو سره دا خطر شته چې ښايي نیمايي وګړو ته یې کافي خواړه ونه رسېږي.

د طالبانو رژیم په رسمیت نه پېژندل اوس د افغانستان او طالبانو لپاره یوه تر ټولو لویه ننګونه ده. نړیواله ټولنه ټينګار کوي چې طالبان باید بشري حقونه په تېره د نجونو او ښځو حقونو ته درناوی ولري.

خو د طالبانو له واک ته رسېدو وروسته له یو محدود شمېر پرته نورې مېرمنې په کور کېنول شوې او له څو ولایتونو پرته نژدې یوه نیمه میاشت کې کېږي چې د افغانستان په نورو اکثرو ولایتونو کې د متوسطه او ثانوي مرحلې زدکوونکې نجونې ښوونځي ته د تګ اجازه نه لري.

خو طالبان وايي هڅه کوي د مېرمنو لپاره د کار او زدکړې مناسب چاپیریال رامنځته کړي.