تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
سراج الدین حقاني دنده پیل کړه خو امریکا یې لا هم پر سر نغدي جایزه لګولې
د طالبانو حکومت کې د کورنیو چارو وزارت سرپرست سراج الدین حقاني رسماً دنده پیل کړي. ښاغلی حقاني په هغو کسانو کې شامل دی، چې د امریکا فدارلي پولیس یې 'په لوړ کچ تعقیب ' کوي.
د طالبانو د ویاند ذبیح الله مجاهد سکرتر بلال کريمي له بي سي سره خبرو کې تایید کړه چې د پنجشنبې پر ورځ د ښاغلي حقاني د لوړې مراسم تر سره شول.
د طالبانو حکومت یو شمېر غړي د هغو کسانو په نوملړ کې شامل دي، چې د امریکا فدارلي پولیس یې لټون کوي.
سراج الدین حقاني له همدې کسانو یو دی چې دا وروستیو کې د امریکا ایف بي ای ادارې په وېبپاڼه کې یې 'د هغو اطلاعاتو بدل کې چې پایله کې یې نوموړی ونیول شي، ' د جایزې کچه له پنځو میلیونو ډالرو لسو میلیونو ډالرو ته زیاته شوې وه.
بل لور په افغانستان کې یو شمېر ځايي خبریالانو په رپوټونو کې ویل شوي چې ښاغلي حقاني د افغانستان کورنیو چارو سرپرست وزیر په توګه رسماً دنده پیل کړې ده.
دې رپوټونو کې ویل شوي د سرپرست وزیر په توګه د سراج الدین حقاني د معرفي مراسمو کې قطر کې د طالبانو مرکچي پلاوي مشر شیخ عبدالحکیم حقاني او خپله سراج الدین حقاني ویناوې کړې.
طالبان وايي، له امریکا سره د دوی د تړون له مخې باید د دوی د مشرانو نومونه د امریکا متحدو ایالتونو او ملګرو ملتونو له تورو لیستونو وایستل شي.
د ملا محمد حسن اخوند نوم هم دې لیستونو کې شامل دی، چې د طالبانو لخوا د سرپرستې کابینې له لپاره د 'رئیس الوزرا ' په توګه ګومارل شوی دی.
د پنجشنبې پر ورځ د طالبانو ویاند ذبیح الله مجاهد په یوه ټویټر پیغام کې وویل، ''د تور لیست په هکله د امریکا دریځ د قطر له هوکړې سر غړوونه ده. ''
د طالبانو بهرنیو چارو وزیر ګومارنه
د طالبانو بیانیه کې ویل شوي، د سرپرستې کابینې یو شمېر غړو نومونه د امریکا په تورو لیستونو کې هم شته او ''اوس '' هم تر تعقیب لاندې دي.
د طالبانو اعلامیه زیاتوي:
''امارت اسلامي دا ډول دریځ د دوحې هوکړې څرګند نقض بولي چې نه هم د افغانستان او نه هم د امریکا متحدو ایالتونو په ګټه دی. ''
بل لور د کابینې له اعلانه څو ورځې وروسته نن شنبه د طالبانو د ادارې د بهر نیو چارو سر پرست وزیر امیر خان متقي هم کار پیل کړ.
ښاغلي متقي د بهر نیو چارو وزارت کارکونکو ته د وینا پر مهال وویل چې دوی او د سفارتونه کار کوونکي او نور دیپلوماتان دې په ډاډه زړه سره کارونو ته دوام ورکړي.
ښاغلي متقي د بهر نیو چارو وزات مامورینو ته وینا کې وویل، ''د خلکو درملنه ډاکتر کار دی، نړۍ سره د اړیکو ټینګول د یوه ښه دیپلومات کار دی، اقتصاد او د سوداګرۍ، راکړه ورکړه د یوه ښه اقتصاد پوه او د ملي سوداګرو دنده ده. ''
نوموړی وايي، ''دا د ملا او طالب کار نه دی. ''
امیر خان متقي یو جګپوړي طالب مشر دی چې تر دی وړاندې په دوحه کې د طالبانو د مذاکرتي ډلې غړی، د طالبانو د د عوت او ارشاد د کمېسیون غړی او د طالبانو په مخکني حکومت کې د اطلاعاتو او کلتور وزیر و.
