تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
ذبیح الله مجاهد: د پنجشېر ستونزه به حل شي؛ امریکایان دې افغانان وتلو ته نه هڅوي
د طالبانو ویاند ذبیح الله مجاهد په کابل کې دویمه خبري غونډه کې د خبریالانو پوښتنو ته ځوابونه وویل. ښاغلي مجاهد وویل، طالبانو د سفارتونو امنیت لپاره اقدامات کړي او له بهرنیو دیپلوماتانو یې وغوښتل چې خپلو فعالیتونو ته دوام ورکړي.
د بهرنیو ځواکونو وتلو مودې غځېدو په هکله د بي بي سي پوښتنې ته ځواب کې ذبیح الله مجاهد وویل، طالبان غواړي هغه ټول کسان چې بهرني پاسپورټونه لري، د اګست ۳۱ تر ټاکلې مودې پورې له افغانستانه ووځي، خو په وینا یې دوی له هېواده د افغانانو وتلو 'پلوي ' نه دي.
نوموړي له افغانانو وغوښتل چې کورونو ته ستانه شي او دغه راز یې له امریکایانو هم غوښتنه وکړه چې (افغانان) د هېواد پرېښوولو ته 'و نه هڅوي '.
ښاغلي مجاهد وویل:
''موږ له امریکایانو وغوښتل چې د افغانانو تخلیه کولو بلنه پرېږدي. زموږ کدرونه به په بهرنیو هېوادونو کې په لومړنیو (ټیټو) کارونو بوخت شي. ''
نوموړي په داسې حال کې چې د دولت غړي نه دي اعلان شوي، له خدماتي ادارو وغوښتل چې خپل فعالیتونه پیل کړي.
هغه د بېلګې په توګه د افغانستان بانک یادونه وکړه او په وینا یې (نن یا سبا) به بانکونه فعالیت پیل کړي او سبا به اقتصادي راکړه، ورکړه پیل شي.
ښاغلي مجاهد دغه راز د پوهنې او لوړو زدکړو په هکله وویل چې تعليمي ادارې به فعالیتونه بېرته پیل کړي.
د ښځینه کارکوونکو په هکله نوموړي وویل، د هغوی خوندیتوب لپاره تدبیرونه شوي او وروسته به خپلو دندو ته ستنې شي.
نوموړي دې لړ کې وویل:
''د ښځو برخه کې ځینې مسایل شته. موږ باید د خپل ځواک لپاره یوه کاري تګلاره چمتو کړو، چې ټول پوه شي له ښځو سره باید څه ډول چلن وشي. ''
خو ښاغلي مجاهد د دې مسایلو پر جزیاتو څه و نه ویل.
د پنجشېر ستونزه به حل شي
د طالبانو ویاند د "پنجشېر ستونزې" په هکله وویل چې دا یوه کوچنۍ ستونزه ده او هڅې روانې دي چې د خبرو له لارې حل شي. ښاغلي مجاهد وویل، طالبان جګړه پای ته رسېدلې بولي.
نوموړي زیاته کړه:
"په سلو کې اتیا سلنه چارې پر مخ تللې دي او ډاډه یم چې دا موضوع به له سوله ییزې لارې حل شي.''
د ملي پوځ په هکله ښاغلي مجاهد وویل، د دوی هڅې روانې دي چې پوځ بیا جوړ کړي.
د نوموړي په وینا سرتېري به بیا استخدام شي او پخواني وتلي کسان به هم بیا استخدامېږي.
د طالبانو ویاند د خپل مشر ملا هبت الله اخندزاده د ځای ځایګي یوې پوښتنې په ځواب کې وویل، نوموړی به ډېر ژر ولیدل شي.
هر څه چې له شریعت سره سم وي، اجازه لري
د فلم جوړوونکو او هنرمندانو استازي پوښتنه وکړه، ایا موږ به د فعالیت اجازه ولرو؟
ښاغلی مجاهد وايي، راتلونکی نظام به د "شریعت احکامو" پر بنسټ کار کوي، هر څه چې له شریعت سره سم وي، اجازه لري.
