ولسمشر ټرمپ: طالبان هم افغانستان کې زموږ له شتونه ګټه اخلي
د عکس سرچینه، Getty Images
د امریکا ولسمشر ډونلډ ټرمپ په یوه کمسارې ادعا کې ویلي، طالبان په افغانستان کې د امریکایي پوځیانو د شتون په اړه ګډوډ پیغام ورکوي. ولسمشر ټرمپ په خپل ټویټ کې د ډالرو سمبول ($) کارولو سره ویلي، طالبان افغانستان کې د امریکا له شتونه ګټه اخلي.
ولسمشر ټرمپ د خپلې دې ادعا په اړه کوم وضاحت نه دی کړی، خو یو ځل بیا یې ویلي چې امریکایی پوځ افغانستان کې د پولیسو رول ترسره کوي.
ډونلډ ټرمپ دا ټویټونه د وال سټریټ ژورنال د هغې سرمقالې په غبرګون کې کړي چې پکې له نوموړي غوښتنه شوې وه چې د افغانستان په مسله کې بیړه ونکړي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
نوموړي د دې سرمقالې په ځواب کې پر خپله ټوېټر پاڼه لیکلي:
"دوی (وال سټریټ ژورنال) ته دې څوک ووایي چې موږ له تېرو ۱۹ کالو راهیسې په افغانستان کې یو. سره له دې چې اوس مو هلته د پوځیانو شمېر کم شوی، خو موږ بیړه نه کوو".
په یو بل ټویټ کې ولسمشر ټرمپ وایي، طالبان له افغانستانه د امریکا د وتلو په اړه ګډوډ دریځ لري. نوموړي د ډالرو سمبول ($) په کارولو سره په اشارې ویلي چې طالبانو امریکا په افغانستان کې پاتې کېدو ته اړ ایستلې او له شتونه یې ګټه اخلي.
د امریکا ولسمشر همدا راز وایي، له لومړیو کلونو پرته په دې نوره موده کې امریکا افغانستان کې د بریا لپاره جګړه نه ده کړې.
ښاغلي ټرمپ ویلی، امریکا په افغانستان کې د یو ځواکمن پوځ په توګه نه ده، بلکې د یو پولیس ځواک په توګه مېشته ده.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
امریکایی ولسمشر ډېر ځله په دې تورن شوی چې بې بنسټه ادعاوې کوي، او یا هم د خپلو خبرو یا تورونو په اړه وضاحت نه ورکوي.
له دې ټویټونو هم څرګنده نه ده چې ښاغلي ټرمپ هدف څه دی، او طالبان څه ډول په افغانستان کې د امریکا له شتونه ګټه اخلي.
وسله والو طالبانو تر دې دمه د ولسمشر ټرمپ وروستیو څرګندنو په اړه څه نه دي ویلي. خو په تېر کې دې ډلې تل ټینګار کړی چې له افغانستانه د ټولو بهرنیو ځواکونو وتل غواړي.
امریکا او طالبانو په تېره فبرورۍ میاشت کې په دوحه کې خپلمنځي تړون لاسلیک کړ.
د عکس سرچینه، Getty Images
د دې تړون له مخې طالبان نور په افغانستان کې پر مېشتو امریکایي پوځیانو او اهدافو بریدونه نه کوي.
خو افغان حکومت وایي، د دې تړون لاسلیک کېدو راهیسې طالبانو پر افغان ځواکونو او حکومتي ادارو خپل بریدونه ډېر کړي دي.
د همدې ډېرېدونکو بریدونو په ځواب کې افغان ولسمشر محمد اشرف غني تېره اوونۍ اعلان وکړ چې افغان ځواکونه نور له دفاعي حالته ووځي او د دوښمن پر ضد تعرضي عملیات پیلوي.
