"افغان ځواکونو د بدخشان یمګان ولسوالۍ له طالبانو بېرته ونیوله"

افغان امنتي ځواکونو له څلورو کلونو وروسته د بدخشان یمګان ولسوالۍ د طالبانو له ولکې بېرته ونیوله. د یمګان ولسوالۍ په ګاونډ کې وردوج ولسوالۍ یو له هغو درېو ولسوالیو وه چې واک یې له طالبانو سره وو خو دوه ورځې وړاندې دا ولسوالۍ هم د افغان ځواکونو په واک کې ولوېده.

طالبانو تر اوسه د افغان امنیتي ځواکونو لخوا د یمګان ولسوالۍ د بېرته نیولو په تړاو څه ندي ویلي، خو د بدخشان والي محمد ذکریا سودا ویلي دي چې دا ولسوالۍ بېرته د امنیتي ځواکونو لاسته لوېدلې او د هغو سیمو د بیا نیولو لپاره هم عملیات روان دي چې د طالبانو په واک دي.

بل لور ته د افغانستان په تخار ولایت کې سیمه ییزې سرچینې وایي چې نن (وږی ۱۸/سپټمبر ۹) طالبانو د دې ولایت پر خواجه غار او ینګي قلعه ولسوالیو بریدونه کړي او جګړه روانه ده.

د تخار د پولیسو مشر د طالبانو بریدونه مني او زیاتوي چې دا بریدونه د سهار یوه بجه په دې ولسوالیو کې د پولیسو پر پوستو پیل شوي دي، خو وايي امنیتي ځواکونو برید کوونکي په شا تمبولي.

د تخار پولیسو په یوه خبرپاڼه کې ادعا کړې چې د طالبانو د سرې قطعې قومندان په دې جګړه کې وژل شوی.

دوی وايي سیمه ته تازه دمي ځواکونه استول شوي.

د خواجه غار ولسوال محمد عمر وايي، جګړه اوس د ولسوالۍ د ودانۍ او د پولیسو د قومندانۍ شاوخوا روانه ده. دده په خبره د دې ولسوالۍ ډېره برخه طالبانو ولکه کړې.

هغه سیمه ته د کومکي ځواکونو رسېدل رد کړي او وايي، تر اوسه شپږ افغان سرتیرو ته مرګ ژوبله اوښتې.

طالبانو ادعا کړې چې د خواجه غار ولسوالۍ یې نیولې او په ینګي قلعه کې جګړه روانه ده.

تېره ورځ وسله والو طالبانو وکوای شول چې د کندز دشت ارچي ولسوالي چې د خوجه غار سره نژدې ولسوالۍ ده ونیسي.

دې ډلې وار وار په دې ولسوالیو بریدونه کړي.

د خوجه غار ولسوالي د شپږو نورو ولسوالیو سره لار لري او بلخوا له تاجکستان سره پوله کې پرته ولسوالۍ ده. له همدې امله ددې ولسوالۍ اهمیت زیات دی.