د سولې خبرې؛ ولسمشر غني کابل کې له خلیلزاد سره وکتل

د افغانستان د سولې او پخلاینې لپاره د امریکا ځانګړی استازی سیمې ته د خپل شپږم سفر په لړ کې نن دوشنبه کابل ته رسیدلی دی. ښاغلي خلیلزاد نن په کابل کې له ولسمشر محمد اشرف غني، اجرائیه رئیس عبدالله عبدالله او د بهرنیو چارو له وزیر صلاح الدین رباني، او همدا راز د سولې خبرو لپاره د افغان حکومت له مرکچي پلاوي سره کتلي دي.

له هغه وروسته چې د افغانستان د ملي امنیت سلاکار حمدالله محب تېره میاشت د افغانستان د سولې بهیر کې د زلمي خلیلزاد رول په اړه شک څرګند کړ، دا کابل ته د خلیلزاد لومړی رسمي سفر دی.

بله خوا طالبانو ته نږدې سرچینې وايي، د ځينو افغان چارواکو له اعتراضونو او له افغانستانه د امریکا د وتلو په اړه د زلمي خلیلزاد له څرګندونو وروسته د شپږم پړاو خبرې له څه سوړوالي سره مخ دي.

کابل ته د خلیلزاد دا سفر د افغانستان د ملي امنیت سلاکار حمد الله محب پر سر د کابل او واشنګټن اړیکو له خرابیدو وروسته تر سره شوی دی .

زلمي خلیلزاد په خپله ټویټر پاڼه لیکلي چې د سولې لپاره د افغان دولت له مرکچي پلاوي سره يي د بین الافغاني خبرو د جدي اړتیا په سر خبرې کړې دي. خو ده تر اوسه له طالب استازو سره د شپږم پړاو خبرو او نیټې په اړه څه ندي ویلي.

د دې مرکچي پلاوي یوې غړې او د اطلاعاتو کلتور وزیرې حسینه ساپۍ بي بي سي ته وویل، په دې غونډه کې د نظام او لاسته راوړنو په پایښت او د افغانانو په ځينو اندیښنو خبرې وشوې.

ښاغلی خلیلزاد داسې مهال په کابل کې دی چې امریکا د افغان ولسمشر د ملي امنیت سلاکار حمد الله محب د هغو څرګندونو په غبرګون چې خلیلزاد يي د خپلو شخصي ګټو په پاللو تورن کړی و له ده سره د اړیکو د پرې کیدو خبره کړې او خپلو ډيپلوماټانو ته يي له ده سره د نږدې کار د نه کولو سپارښتنه کړې ده.

خو اوس له دې سره هم مهاله د ملي امنیت شورا سلاکار حمدالله محب په ښکاره د کونړ او نورستان ولایتونو د امنیتي وضعیت د څیړلو لپاره دې ولایتونو ته سفر کړی دی.

ټاکل شوې وه چې د امریکا او طالب استازو تر منځ د شپږم پړاو خبرې هم روانه اونۍ تر سره شي خو تر اوسه کوم لوري په دې اړه څه نه دي ویلي.

د طالبانو د وخت یو چارواکی او د خلاصون شورا مشر سید اکبر اغا چې له دې ډلې سره نږدې اړیکي لري وايي، دواړه لوري تر اوسه د امریکايي ځواکونو دوتلو پر سر د نظر اختلافات لري.

له دې وړاندې زلمي خلیلزاد له بي بي سي سره په خبرو کې ویلي وو چې له افغانستان څخه د امریکايي ځواکونو وتل د څو کلونو موضوع ده.

د سولې لپاره د امریکا د ځانګړي استازي له هڅو سره ټاکل شوې چې د مسکو د ناستې دویمه غونډه، چې په بین الافغاني خبرو مشهوره ده، تر راتلونکو دوه اونیو پورې په قطر کې جوړه شي.

.