تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
له طالبانو سره تر خبرو وروسته عباس عراقچي کابل ته تللی
- Author, زلمی اشنا
- دنده, بي بي سي
د ایران د بهرنیو چارو وزارت مرستیال عباس عراقچي، چې تېره اوونۍ یې له طالب پلاوي سره په تهران کې کتلي او خبرې کړې، نن 'شنبه جنورۍ پنځمه ' افغان چارواکو سره د خبرو لپاره کابل ته رسېدلی.
د افغانستان ولسمشرۍ ماڼۍ ویلي، ښاغلي عراقچي له ولسمشر محمد اشرف غني سره کتلي او د دواړو دولتونو تر منځ د هراړخیزو اړیکو د ارزښت، د افغانانو په مشرۍ او مالکیت د سولې بهیر او په ایران کې له چابهار بندره د غوره ګټه اخیستنې د څرنګوالي په اړه یې خبرې کړې دي.
د ایران د بهرنیو چارو وزرات مرستیال عباس عراقچي کابل ته د سفر په ترڅ کې له طالبانو سره د ایراني چارواکو د وروستۍ ليدنې په اړه، ولسمشر محمد اشرف غني ته مالومات ورکړل او د افغان حکومت په مشرۍ او مالکیت، د سولې بهیر د دوام لپاره یې د هغه هېواد د ژمن پاتې کېدو ډاډ ورکړی.
د افغانستان بهرنیو چارو وزارت چارواکي وايي، ښاغلي عراقچي په کابل کې د دغه وزارت له مرستیال وزیر ادریس زمان سره کتلي او ټاکل شوې چې له اجرایيه مشر عبدالله عبدالله او د بهرنیو چارو له وزیر صلاح الدین رباني سره هم وویني.
تېره اوونۍ د ایران بهرنیو چارو وزارت چارواکو، تهران ته د طالبانو د پلاوی د سفر او افغان سولې بهیر سره د مرستې خبره وکړه.
په تېرو لسو ورځو کې، د ایران لوړپورړو چارواکو دوه ځله کابل ته سفرونه کړي. تېره اوونۍ د ایران ملي امنیت شورا منشي علي شمخاني هم کابل ته تللی و او د افغانستان د ملي امنیت شورا له مشر حمد الله محب سره د لیدنې پر مهال یې، طالبانو سره د سولې خبرو اترو په اړه مالومات ورکړل.
د افغانستان د سولې عالي شورا غړي او په ملګرو ملتونو کې د طالبانو د پخواني استازي عبدالحکیم مجاهد د افغان سولې په خبرو کې د ایران رول مهم ګڼي:
''زما په باور ایران د سیمې یو مهم لوبغاړی دی. یوه لور ته له پخوا راهیسې له طالبانو سره اړیکي لري او له بله پلوه په سیمه کې هم اغېز لري، نو که د سیمې هېوادونو د سیمه ییزې اجماع په صورت کې د سولې لپاره همغږې چارې پیل شي، زما په باور دې کې به د افغانستان لپاره خیر وي، د سیمې لپاره به خیر راوړي او پایله کې به یوه تل پاتې سوله راشي. ''
طالبانو ایران ته د خپل پلاوي سفر منلی و او دا یې د خپلو سیمه ییزو سفرونو له جملې یاد کړی و.
څه موده وړاندې طالب او امریکايي استازو ابوظبۍ کې مخامخې خبرې وکړې. دغه ناسته کې د پاکستان، سعودي او متحده عرب امارات هېوادونو استازو هم ګډون کړی و، خو طالبانو په تېرو څو ورځو کې د خبرپاڼو په خپرولو سره، له افغان مرکچي پلاوي سره، د خبرو کول رد کړي دي.
ټاکل شوې طالبان په نژدې راتلونکې کې جده کې هم د سولې په اړه یوه غونډه کې برخه واخلي.
