تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د غزني د خوګیاڼو د نیول کېدو په هکله ضد او نقیض رپوټونه
د غزني چارواکي وايي، د خوګياڼو ولسوالۍ په قلعه سرخ سیمه کې پر یوه پوسته د وسلوالو طالبانو په برید کې ۴ پولیس وژل شوي او ۹ ټپیان دي.
د والي ویاند محمد عارف نوري بي بي سي ته وویل، دا مرګ ژوبله د طالبانو په توغندیز برید کې پولیسو ته اوښتې ده.
خو د غزني د ولایتي شورا غړی او منشي حسن رضا وايي،، چې په دې برید کې ۹ پولیس وژل شوي او د نورو درک نشته.
د نوموړي په خبره، ولسوالي دا مهال د وسلوالو طالبانو په لاس کې ده.
دا ولسوالي د غزني ښار ۱۵ کیلومتره لوېدیز ته پرته ده
خو د وسلوالو طالبانو یو ویاند ذبیح الله مجاهد رسنیو ته په استولې اعلامیه کې وایي د غزني په خوګیاڼو ولسوالۍ کې یې هغه مرکز نیولی چې افغان حکومت د ولسوالۍ نوم ور کړی و.
نوموړی وایي، پر دغه ولسوالۍ د برید پر مهال یې ۱۲ پولیس وژلي دي.
ذبیح الله مجاهد دا هم وايي، چې خوګیاڼو ولسوالي لا د مخه دوی نیولې، خو حکومت په قلعه قاضي کې یو مرکز ته د ولسوالۍ نوم ور کړی و او دوی ونیو.
ویل کېږي د طالبانو د بریدونو په زیاتېدلو سره افغان امنیتي ځواکونو د تاکتیکي شاتګ په نوم له خوګیاڼو شاتګ کړی و او وروسته یې یوه بله ولسوالي جوړه کړه.
نږدې دوه اونۍ وړاندې وسلوالو طالبانو د غزني ولایت اندړو ولسوالۍ کې په موټربم برید سره لږترلږه ۲۵ افغان امنیتي ځواکونه او پنځه ولسي وګړې ووژل او ۲۰ نور پوځيان یې ټپیان کړل.
