د اندونیزیا فوټبال سیالۍ ټېل ماټېل کې ۱۷۴ تنه وژل شوي
اندونیزیا کې د فوټبال تر یوې سیالۍ وروسته ټېل ماټېل کې لږترلږه ۱۷۴ کسان وژل شوي.
چارواکو ویلي دا کسان تر هغې وروسته تر پښو لاندې شول چې پولیسو د لوبډلو د قهرېدلو مینوالو خورولو لپاره اوښلن ګاز وکاراوه.
د 'ارېما اېف سي' او 'پېرسبایا سورابیا' فوټبال کلبونو ترمنځ دا لوبه د اندونیزیا ختیځ جاوا ټاپو کې کېده چې د ارېما په ماته تمامه شوه.
تر دې لوبې وروسته هله ګوله کې لږترلږه ۱۸۰ کسان ټپیان شوي هم دي.
په خواله رسنیو خپرو شویو ویډیوګانو کې ښکاري چې مینوال د لوبې د پای له اعلانېدو سره سم لوبغالي ته ورځغلي.
ختیځ جاوا کې د پولیسو یوه مشر ویلي تر دې وروسته پولیسو د اوښکې بهوونکي ګاز ډزې وکړې، چې پایله کې یې ټېل ماټېل جوړ شو او د ځینو خلکو ساه پکې بنده شوه.
په وژل شویو کې دوه پولیس افسران هم شامل دي.
د عکس سرچینه، EPA
د پولیسو دغه قوماندان زیاتوي: "څلور دېرش کسان لوبغالي کې دننه مړه شول. نورو په روغتون کې ساه ورکړه."
دی وايي "دوی [له لوبغالي] د وتلو پر یوې نقطې ورټول شول. ټېل ماټېل کې د اکسیجن کمېدو له کبله د ساه بندوالی پیدا شوی."
پر خواله رسنیو لاس په لاس کېدونکو ویډیوګانو کې ښکاري چې په ځمکه مړي پراته دي.
د عکس سرچینه، EPA
د اندونیزیا فوټبال ټولنې "پي اېس اېس ای" ویلي چې د دې پېښې په اړه یې څېړنې پیل کړې دي.
پر دې سربېره دغه هېواد کې د فوټباله غوره لیګ سیالۍ هم یوه اوونۍ ځنډول شوې دي.
تر دې وړاندې هم د نړۍ ځینو هېوادونو کې د لوبو پر مهال دا ډول خونړۍ پېښې شوې دي.
په ۱۹۶۴ کال لیما کې اولمپیک سیالیو ته وتلو لپاره د پېرو او ارجنټاین ترمنځ د فوټبال لوبې پر مهال ټېل مټېل کې ۳۲۰ کسان وژل شوي او تر ۱۰۰۰ ډېر ټپي شوي وو.
په ۱۹۸۹ کال د بریتانیا د شيفیلډ هېلزبرو لوبغالي کې د ګڼې ګوڼې له کبله د یوې کټارې ماتېدو پېښه کې د لېورپول لوبډلې ۹۶ مینوال وژل شوي وو.
د ټېل ماټېل دا پېښه په سټډیم کې تر ټولو خونړۍ او غمجنه ګڼل شوې ده.
په ۱۹۸۵ کال د بلجیم بروکسل هېسل لوبغالي کې د انګلستان لیورپول او ایټالیا یونتوس ترمنځ د لوبې پرمهال مینه وال دېوال ته ایسار کړل شول او د دېوال لوېدو لږ تر لږه ۶۰۰ تنه ټپیان کړل.
