"په سوریه کې د امریکا او روسیې مخامخېدا شونې ده"

اینډیپنډینټ ورځپاڼې لیکلي چې امریکا پر سوریې د برید لپاره شیبې شمېري او په دې سره د امریکا او روسیې ترمنځ مخامخېدا هم شونې دي.

د ورځپاڼې په دې مطلب کې ویل شوي چې د امریکا او روسیې له خوا شویو ګواښونو ته په کتو د دواړو هېوادونو ترمنځ ټکر حتمي ښکاري خو یوازې د وخت او څرنګوالی خبره تر اوسه نامعلومه ده.

اینډیپنډینټ په سیمه او په تېره سوریه کې وضعیت ته خوشبینه نه ښکاري او د دې مطلب په پای کې زیاتوي چې په منځني ختیځ کې وضعیت په چټکۍ بدلېدونکی دی او دا پېښېدونکې شخړه به په سیمه کې چې اوس هم د اور په لمبو کې سوځي، وضعیت لا کړکېچن کړي.

امریکا هند ته د هوايي دفاع ځانګړې وسایل ور کوي

ټایمز اف انډیا لیکي، امریکا په پام کې لري د دفاعي ټیکنالوژۍ پرمختللي حساس وسایل هند ته ورکړي او په دې برخه کې له هندي ځواکونو سره په ګډه پوځي تمرینونه هم وکړي.

د ورځپاڼې په خبره، د دواړو هېوادونو ترمنځ به ګډ پوځي تمرینونه راتلونکې مۍ میاشت کې وشي.

ورځپاڼې په هند کې د امریکا د سفیر کینیټ جسټر له قوله لیکلي، امریکا هند داسې دفاعي ټیکنالوژي ورکوي چې له دې وړاندې یې بل کوم هېواد ته نه ده ورکړې.

نوموړي په یوه وینا کې ویلي، د نوي ډیلي او امریکا ترمنځ اړیکې نورو هېوادونو ته پیاوړی پيغام استوي.

پاکستانۍ ډان ورځپاڼه

ډان ورځپاڼې د خیبر پښتونخوا په دیر کې د پوځ له خوا ملکي ادارې ته د چارو د واګې سپارلو په تړاو خپله سرمقاله کې د دې چارې هر کلی کړې، خو زیاتوي هغه سیمې چې له کړکیچنه حالته راوځي باید اجازه ورنه کړل شي چې په اسانه بېرته د نا امنیو او د وسله والو ډلو د فعالیت ښکار شي.

ورځپاڼه زیاتوي، ناسمې کړنلارې او ناسمه حکومتولي دواړه د سخت دریځۍ او د وسله وال فعالیت د پيل لپاره لاره هواروي او حکومت ته په کار دي چې د دا ډول نیمګړتیاوو مخه ونیسي.

اسراییلۍ ها ارټس ورځپاڼه

اسرايیلۍ ورځپاڼې هاارټس لیکلي، په سوریه کې د وضعیت له کړکېچنېدو سره ښايي له یوې خوا د ایران او اسراییلو او له بل لوري د امریکا او روسیې ترمنځ جګړه رامنځته شي.

ورځپاڼه لیکي اسراییل د ایران له خوا ګواښونو ته په جدي سترګه ګوري او په پام کې ده چې د وضعیت د ارزولو لپاره نن د امنیتي کابینې غونډه وشي.

په اسراییلو کې وروسته له هغه د خبرداري درجه لوړه کړل شوه چې اسراییلي جنګي الوتکو د سوریې په ټیفور هوايي ډګر برید وکړ چې ویل کیږي ایرانیانو ته هم پکې مرګ ژوبله اوښتې ده.