नेपाल निर्वाचनः स्थानीय तह चुनावमा 'धाँधली' भएको एमालेको दाबी, 'अदालत जाने गृहकार्य'

स्थानीय तह निर्वाचनमा सत्तारूढ गठबन्धनले "धाँधली" गरेको आरोप लगाएको प्रमुख प्रतिपक्षी नेकपा एमालेले त्यसविरुद्ध अदालत जाने चेतावनी दिएको छ।

त्यसका लागि अहिले कानुनी परामर्श भइरहेको एमालेका उपमहासचिव प्रदीप ज्ञवालीले बीबीसीलाई बताएका छन्।

"धाँधली"का घटनाबारे पार्टी कार्यालय र पार्टीको निर्वाचन विभागमार्फत्‌ निर्वाचन आयोगलाई नियमित रूपमा ध्यानाकर्षण गराइएको उनले उल्लेख गरे।

आफूले लगाएका आरोपमाथि कारबाही नभए एमाले अदालत त जाँदैन भन्ने प्रश्नमा ज्ञवालीले स्थानविशेषअनुसार त्यस्तो कदम चालिने बताए।

"कतिपय ठाउँको हकमा हामीले त्यस्तो पनि गर्नुपर्ने देखिएको छ। हामी त्यसो पनि गर्छौँ," बीबीसीसँग सोमवार कुरा गर्दै उपमहासचिव ज्ञवालीले भने।

"जहाँजहाँ कानुनी उपचार खोज्नुपर्ने ठाउँ छन् त्यहाँ हामी कानुनी उपचार खोज्छौँ। जहाँ गलत काम भएका छन् त्यसको हामी भण्डाफोर गर्छौँ। यो यो कारण गलत भयो भनेर हामी जनताबीच जान्छौँ।"

एमाले कहिलेसम्म अदालत जान्छ भन्ने प्रश्नमा उनले भनेः "हामी त्यसबारे छलफल गरिरहेका छौँ।"

"धाँधली"का सम्बन्धमा आफूहरूले भनेका कुरा मिथ्या नभई तथ्यमा आधारित भएको दाबी पनि ज्ञवालीले गरे।

प्रारम्भिक नतिजाअनुसार नेकपा एमाले सत्तारूढ नेपाली कांग्रेसभन्दा पछाडि देखिएको छ।

मुख्य आरोप के हुन्?

निर्वाचनका क्रममा गृह प्रशासन "पूर्णतः गठबन्धनको पक्षमा र एमालेको विपक्षमा परिचालित भएको" एमालेले आरोप लगाएको छ।

एमाले महासचिव शङ्कर पोखरेलले जारी गरेको विज्ञप्तिमा विभिन्न १५ बुँदामा आरोप समेटिएका छन्।

एमालेका आरोपहरू "निर्वाचन सुरु हुनुभन्दा अगाडि", "मतदानको समयमा" र "मतगणनाको समयमा" गरी तीन भागमा समेटिएका छन्।

निर्वाचन सुरु हुनुभन्दा अगाडि

मतदानको समयमा

मतगणनाको समयमा

निर्वाचन आयोग के भन्छ?

एमालेले आइतवार लगाएका आरोपबारे निर्वाचन आयोगले आधिकारिक रूपमा कुनै धारणा सार्वजनिक गरेको छैन।

यद्यपि बीबीसीसँग कुरा गर्दै सहायक प्रवक्ता सूर्यप्रसाद अर्यालले राजनीतिक दल र उम्मेदवारहरू सरोकारवाला पक्ष भएकाले उनीहरूले उठाएका विषयलाई आयोगले ग्रहण गरेको बताए।

एमालेका आरोपबारे उनले भने, "जायज कुरामा अध्ययन अगाडि बढाउने कुरा हुन्छ। कतिपय आरोपका लागि मात्रै हुनसक्छ ती कुरा तामेलीमा रहन्छ। त्यसैले त्यसबारे आयोगले अध्ययन गर्छ।"

आयोगले एमालेका कुनकुन आरोपबारे अध्ययन अगाडि बढाउँछ भन्नेबारे चाहिँ सहायक प्रवक्ता अर्यालले केही खुलाएनन्।

निर्वाचन पर्यवेक्षक के भन्छन्?

निर्वाचन पर्यवेक्षण समिति नेपालले विभिन्न ७० जिल्लामा आफ्ना ४०० पर्यवेक्षक पठाएको जनाएको छ।

संस्थाका अध्यक्ष प्रदीप पोखरेलका अनुसार निर्वाचनको अघिल्लो दिनबाट खटेका पर्यवेक्षकहरू चुनावको नतिजा सार्वजनिक नभएसम्म 'फील्ड'मै रहने छन्।

"एमालेले लगाएका आरोपहरू मैले पनि पढेँ। उहाँहरूले भने जस्तो बुथ कब्जा अथवा गठबन्धनको पक्षमा नतिजा पार्नेगरी काम भएको हामीले कतैबाट रिपोर्ट पाएका छैनौँ," बीबीसीसँग उनले भने।

विभिन्न पर्यवेक्षक संस्थासँग आफूहरूले सहकार्य गरेर तर त्यसका खालका गतिविधि भएको भन्नेबारे कसैबाट जानकारी नपाएको पनि पोखरेलले बताए।

"उहाँहरूका आरोप यथार्थमा आधारित छैन। यदि उहाँहरूले सोचे जस्तो प्रारम्भिक परिणाम नदेखिएकोले त्यस्तो अभिव्यक्ति आएको हो भने त्यसबाट राम्रो सन्देश जाँदैन," उनले थपे।

आफूले अपेक्षा गरे जस्तो चुनावी नतिजा नआएपछि चुनावमा धाँधली भएको आरोप लगाउने प्रवृत्ति दक्षिण एशियामै "एउटा रोग" भएको पोखरेलको टिप्पणी छ।

नेपाली कांग्रेसका नेता के भन्छन्?

सरकार र सत्ता गठबन्धनप्रति एमालेले लगाएको आरोपबारे आफ्नो गम्भीर ध्यानाकर्षण भएको कांग्रेसले प्रतिक्रिया जनाएको छ।

प्रारम्भिक नतिजाबाट एमाले "अत्तालिएको" प्रवक्ता प्रकाशशरण महतले सोमवार एउटा विज्ञप्ति जारी गर्दै भनेका छन्।

"…तर निर्वाचनको परिणाम आफूले दाबी गरे जस्तो नआएपछि निर्वाचनको सम्पूर्ण चाँजोपाँजो मिलाउने निर्वाचन आयोग, आयोगको माग र खटनपटन अनुसार काम गर्ने राष्ट्रसेवक कर्मचारी र सुरक्षाकर्मीले निर्वाह गरेको जिम्मेवारीलाई लिएर सरकारलाई योजनाबद्ध रूपमा धाँधली गर्‍यो भन्नु गैरजिम्मेवारीपनको पराकाष्ठा हो," विज्ञप्तिमा भनिएको छ।